Sa regione tedesca de Schleswig-Holstein at detzisu de no impreare prus aplicatziones propietàrias in àmbitu informàticu. Gasi, at aviadu unu progetu de migratzione dae Windows a Linux chi pertocat 30.000 computadores impreados dae s’amministratzione locale. S’annùntziu lu podimus lèghere finamentas in su situ ufitziale de sa regione: «Indipendente, sustenìbile, seguru: su Schleswig-Holstein at a èssere una regione puntera de su digitale e su primu istadu tedescu a introduire un’ambiente de traballu informàticu soberanu in s’amministratzione istatale sua. Cun sa detzisione de su Cussìgiu de sos Ministros de introduire su software a còdighe abertu LibreOffice comente solutzione istandard pro s’ufìtziu, su guvernu at dadu su via lìbera a su primu passu chi punnat a sa soberania digitale cumpleta de s’Istadu».
Podimus afirmare chi sa chistione tzentrale est sa digital sovereignty, est a nàrrere s’indipendèntzia dae sas aziendas in foras de controllu e cun interessos econòmicos. Pro Schrödter – ministru de sa digitalizatzione – custa soberania est parte de s’istrategia digitale e de su programma de traballu de su guvernu. «La pigamus comente cosa sèria a beru – at naradu – e nos semus movende: sa detzisione de mudare s’aplicativu Office est una pedra miliare, emmo, ma petzi su cumintzu de sa transitzione. At a sighire, difatis, su passàgiu a su software lìberu pro su sistema operativu, pro sa prataforma de collaboratzione, pro su servìtziu de directory, pro sas protzeduras ispetzializadas e pro sa telefonia».
Ses sos puntos isvilupados in su Schleswig-Holstein in s’àmbitu de sa soberania digitale: passàgiu dae Microsoft Office a LibreOffice; passàgiu de su sistema operativu dae Microsoft Windows a Linux; collaboratzione in s’amministratzione istatale e cun sugetos esternos; còdighe abertu impreadu in su servìtziu de directory pro sostituire Microsoft Active Directory; inventàriu de sas protzeduras ispetzializadas in contu de cumpatibilidade e interoperatividade cun LibreOffice e Linux; isvilupu de una solutzione de telefonia a còdighe abertu chi at a sostituire Telekom-Flexport.
In terra germànica no est cosa noa su de punnare a solutziones tecnològicas a còdighe abertu: giai in su 2013, su Cussìgiu comunale de Mònacu de Baviera nche pongeit a banda a Windows seberende a Linux.
Gianfranca Orunesu
(Immàgine dae Wikipedia)
Leave a comment