Dae ue benit su tèrmine Bluetooth

                                                          de Salvatore Serra

Su logotipu Bluetooth tenet un’orìgine interessante chi ponet in pare  istòria e simbologia nòrdica.

L’ant imbentadu cumbinende  duas runas de s’iscritura vichinga, sa “Haglaz” ( ᚼ) e sa “Bjarkan” ( ᛒ), chi sunt sas initziales  de su nùmene de su re danesu Harald “Bluetooth” Gormsson, su cale at vìvidu prus de milli annos a como e est  connotu mescamente ca at unificadu su rennu de Danimarca, ma finas pro sa dente morta chi teniat, cun unu colore biatu iscuru/murru chi li fiat bàlidu su paranùmene de “bluetooth” (Blåtand – dente biaita).

Sa  cumbinatzione de custas  runas format su sìmbulu chi oe connoschimus  comente su logotipu Bluetooth.

In su 1996 tres ghias de su setore tecnològicu, Intel, Ericsson e Nokia si sunt addoviadas pro definire una istandardizatzione de sa tecnologia ràdiu a raju curtzu chi esseret a tretu de agiuare sa connetividade e s’ interfaghe intre   produtos e setores industriales diferentes.

In custu addòviu Jim Kardash de Intel at tentu s’idea de impitare in manera provisòria su tèrmine “bluetooth” pro pònnere in craru sa capatzidade sua de reunire su mundu de sos elaboradores e de sos telefoneddos, pròpiu comente aiat fatu Harald I cun sos  territòrios de Danimarca.

Finas a  cando s’ufìtziu marketing no aeret agatadu unu nùmene geniosu, custa   tecnologia noa de ligàmene alàmbricu a raju curtzu  diat èssere istada identificada cun su tèrmine “bluetooth”.

Pustis, cando est bènnidu su mamentu de seberare unu nùmene “sèriu”, ant ipotizadu de impitare RadioWire o PAN (Personal Area Networking). PAN pariat chi depiat bìnchere finas a cando non si sunt abbigiados chi in sas chircas in su web resurtaiat chi custu tèrmine fiat impreadu finas tropu.

Ma in s’ìnteri sas dies si nche fiant coladas e non b’aiat tempus, in  antis de s’essisda ufitziale, pro fàghere un’anàlisi cuidadosa de s’optzione RadioWire; duncas  Bluetooth s’est fatu s’ùnicu sèberu possìbile.

Su tèrmine s’est ispainadu in presse  in totu su setore, devenende in pagu tempus sinònimu de tecnologia alàmbrica  a raju curtzu, a su puntu chi ant pensadu chi non beniat prus bene a lu cambiare.

Leave a comment