Bilinguismu, deretos dennegados, identitade, norma iscrita: de custu e de àteras chistiones s’at a faeddare su 26 de santugaine in sa sala de sa cunferèntzias de su Museu Archeològicu de Terranoa a sas 9. In su cunvegnu, ordimingiadu dae sa setzione Terranoa de su Partidu Sardu (PSD’Az), s’ant a fàghere “arresonos e relatas de importu mannu afurriu, de su tema de sa Limba sarda, de s’Identidade e sa Curtura nostra.”
Sos relatores ant a èssere Pablo Luciano (Valori e identità di una lingua), s’On. Felice Besostri (Legge elettorale europea e minoranze linguistiche, relatore fintzas pro sa lege 482/99 in Parlamentu), s’On. Giacomo Sanna (La proposta sardista sul bilinguismo), Mario Carboni (Dalla proposta di iniziativa popolare il percorso legislativo per la lingua sarda), Diegu Corràine (La norma scritta del sardo per l’uso ufficiale) e Flavio Cabitza (I diritti come opportunità negate). In frau de su cunvegnu ant a intervènnere fintzas su sìndigu de Terranoa Gianni Giovannelli, su Segretàriu Natzionale de su Partidu Sardu Giovanni Colli, s’Assessore a sa Comuna de Terranoa Vincenzo Cachia, s’On. Giampiero Scanu, s’On. Settimo Nizzi, s’abogadu Quirico Sanna, s’On. Antonio Sanna, su dut. Andrea Prato, su Segretàriu CISL de Gaddura Mirko Idili e su presidente de sa Consulta Intercomunale de sa Gaddura, su dut. Quintino Mossa.
Pro sa votatziones de su 2014 sos partidos sunt ponende semper prus a s’ispissu in s’“agenda polìtica” unu programma pro su chi pertocat sa limba sarda, signu craru e nèbidu chi sa polìtica at intesu e cumpresu su sentidu nou de sos sardos.