Dae sos comasinos de Iscanu a sos tzilleris de Golothene, Lodine, Urtei, Monti e Lòcula. Su càntigu a tenore torrat in sos logos suos

Dae sos comasinos de Iscanu a sos tzilleris de Golothene, Lodine, Urtei, Monti e Lòcula. Su càntigu a tenore torrat in sos logos suos

Comintzat su 10 de trìulas in sos comasinos de Iscanu, sighit s’incras in Golothene e posca nche lompet su 17 a Lodine, su 18 a Urtei, su 23 a Monti e su 26 a Lòcula. Custas sunt sas ses biddas interessadas dae sa sèrie noa de “In Tzilleri, vecchi e nuovi contesti del Canto a Tenore”.

“In Tzilleri” est una de sas fainas programmadas in intro de “Istèrridas: Ricerca, salvaguardia e diffusione della pratica del canto a Tenore” (progetu de s’Istitutu Superiore Regionale Etnogràficu finantziadu cun fundos ministeriales de sa L. 77/2006) chi ocannu ponet in parte sos tzilleris de sas comunidades mentovadas a pustis de una prima editzione de su 2022 isparghinada in sos de Patada, Padru, Oroteddi e Durgali.

«Apuntamentos periòdicos intre cantores e apassionados – narat Diego Pani, responsàbile tècnicu iscientìficu de su progetu – pro istare paris e pro li torrare a su càntigu a tenore cussa funtzione sua de aunimentu sotziale, de addòbiu intre sas generatziones abertu a totu cantos, pro si manifestare e pro dare a sas levas noas sa possibilidade de imparare “sa moda” de sa bidda dae sa boghe bia de sos prus mannos e non dae sos discos o dae YouTube ebbia».

Sos tzilleris, chi in sas comunidades nostras galu oe sunt unu puntu de addòbiu, de aunimentu e de iscàmbiu de grandu importu, in su tempus ant rapresentadu pro sos cantores su mègius logu de annestru pro s’arte issoro. E como torrant protagonistas de sos càntigos comunitàrios, sena amplificatzione, sena bestires de su connotu.

«S’idea nostra – agiunghet Bustianu Pilosu, coordinadore de sa Rete de su càntigu a Tenore – est sa de recuperare nessi in parte custos logos, mancari in ocasiones ispetziales, in collaboratzione cun sos tzillerajos e sas amministratziones. De custa manera custos ses addòbios propostos dae su progetu “Istèrridas” si presentant comente unu modellu, un’esempru de giudu pro totu sas comunidades, in maneras ispontànea e fintzas organizada».

Primu apuntamentu, duncas, su 10 de trìulas, mèrcuris, dae sas 20 a sas 22.30, cun su “Cuncordu Sas Bàtoro Colonnas” chi faghet sos onores de domo e àteros duos grupos de càntigu de àteras biddas: su “Santu Laretu” de Silanos e su “Pòpulu sardu” de Ulìana.

Gianfranca Orunesu

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *