Trint’annos a como in Thiniscole naschiant sos Askra. Unu nùmene chi bolat dae su truncu de su combat rock chi in Baronia pongeit raighinas comintzende cun sos Kenze Neke (chi cun issos cumpartzeint s’Ep “Gherramus tott’impare”, su 1996). Como custos trint’annos cherent festados totu cantos e s’ocasione est su cuntzertu de custu sero in sa Marina de Thiniscole (La Caletta). In programma unas trinta cantzones pigadas dae totu sas essidas discogràficas issoro (“A sa muta” de su 96, “Ya bastat” de su 2000, “Hijos” de su 2004 e “Colores…dolores” de su 2009). In palcu sa formatzione originale (sa de sa foto): Alessandro Chighini (chiterra), Marco Cau (chiterra e boghe), Sandro Usai (boghe e bateria) e Pierpaolo “Fikus” Pau (bassu). In pare cun issos sos chi si sunt annantos a pustis: Mirko Carbini (bassu), Luciano Sezzi (sax), Homar Farina (boghe), Sergio Putzu (fisarmònica) e Mauro Conti (bateria, cando no la sonat Usai). Ma finamentas àteros òspites comente sas boghes betzas de Stefano Ferrando e Fabio Carta e àteros. Su cuntzertu l’ant a abèrrere sos C4 de Silì, grupu punk oi! Sos Askra in custos trint’annos ant connotu carchi pasu, ma mai ant postu a banda…sa banda! E podet dare chi su cuntzertu de oe – antitzipadu dae carchi sessione in sala proas in su sartu thiniscolesu – abèrgiat unu capìtulu de s’istòria issoro. Cantzones noas? «In su cuntzertu nono, ma nd’amus unas cantas pasende in calàsciu, pro seguru las amus a torrare a leare in manos e, a pustis de àere fraigadu s’istrutura musicale, amus a istèrrere sos testos, semper in sardu, mancari cun carchi innestu in àteras limbas». Sos testos ant a èssere in lìnia cun su chi ant giai iscritu? «Beh, semus unu grupu impignadu, semper a costàgiu de sos pòpulos oprimidos e de sas culturas issoro minorizadas, semus semper contra a sas gherras imperialistas, semus pro s’amparu de s’ambiente e in pare cun sos traballadores». A custu sero, a sas 22 intrende a La Caletta dae Thiniscole.
màuru piredda
Leave a comment