S’Istitutu Bellieni de Tàtari, paris cun sa Regione Sardigna, s’Universidade de Edimburgu e sas comunas de Irbono, Lotzorai, Elini, Talana, Àrthana e Baunei presentat “Bilinguimu creschet”. Sa manifestatzione at a èssere presentada mèrcuris, 23 de mese de ladàmine/santugaine in s’àula magna de s’ex iscola mèdia de Lotzorai a sas 9 de mangianu e in sa sala Polifuntzionale de sa Biblioteca comunale de Irbono a sas 4 de borta de die.
“Bilinguismu creschet”, ativu in Sardigna dae ladàmine/santugaine de su 2012, est una filiale de s’organizatzione “Bilingualism Matters” ghiada dae sa Prof.ra Antonella Sorace in s’Universidade de Edimburgu, est unu servìtziu chi at sa punna de informare sa comunidade in pitzu de su bilinguismu, dende informatziones craras e contivigiadas a famìlias, maistros, educadores e amministradores.
In su cunvegnu de su 23 ant a èssere presentados duos seminàrios informativos, fatos pro sos babbos e sas mamas, pro sos manneddos e sas manneddas, pro sos insignantes e sas maistras, chi ant a ispricare s’importu pro su pitzinnu de s’aprendimentu de prus limbas. In particulare ant a ispricare chi su de allegare in sardu a su pitzinnu, paris cun sa limba italiana, o cale si siat àtera limba chi siat allegada in domo, dat a su pitzinnu matessi s’istima de issu etotu e l’at a abèrrere unu mundu prus mannu pro mèritu de custa sienda chi est sa limba nadia.
Sos addòbios ant a èssere ghiados dae espertos de bilinguismu comente Antonella Sorace, Linguista de s’Universidade de Edimburgu e fundadora de su Servìtziu de informatziones Bilingualism Matters/ Bilinguismu Creschet. In prus ant a allegare Michele Pinna, istudiosu de limba sarda e diretore Iscientìficu de s’Istitutu Bellieni, Daniela Masia, operadora culturale ispetzializada in limba sarda, e Mariantonietta Piga, diretora de s’Ufìtziu de sa Limba Sarda de sa Provìntzia de Nùgoro.