Sa còntiga diat dèvere èssere sa chi s’agiornamentu manuale, annu cun annu e Paisu cun Paisu, fiat una cosa oramai grae a la sighire. Ma unas cantas rimotziones dae sas dies de festa in Google Calendar parent in lìnia cun sa furriada filotrumpiana de sas grandes aziendas big tech, mescamente in contu de amparu de sas diversidades. Su Pride Month, su mese dedicadu a sas comunidades Lgbtq+, non b’est prus. Bogadu. Gasi etotu su Black History Month pro su chi pertocat s’istòria e sa cultura de sos afroamericanos. Idem su Women’s History Month in contu de iscobertas fatas dae sas fèminas in s’istòria. Su matessi pro s’Indigenous People Month e àteros momentos de cummemoratzione de minorias.
Lassadas duncas visìbiles petzi sas festas natzionales e traditzionales. Su chi nos ant contadu in Itàlia lu podimus bìdere faghende una rassigna minuda de unos cantos giornales. Su Corriere della Sera at naradu chi «Google s’inghenugrat a Trump». Su Giornale de Sallusti at imbetzes iscritu «Google Calendar anti-woke. Sighit s’efetu Trump». E in custu giornale matessi – tocat a los lèghere cada tantu – iscrient chi «non paret cosa casuale su de nch’àere bogadu unas cantas ricurrèntzias serentes a cussu mundu in colores de arcu de chelu e a sos promotores de s’ideologia woke. Como su tempus de custas datas impostas a sos utentes paret finidu de su totu e s’efetu Trump no est un’impressione ebbia. A pustis de sa torrada sua a sa Domo arba, sunt medas sas multinatzionales chi ant seberadu de si lassare a palas sos diktat ideològicos adotados finas a pagu tempus a como».
E no est fàula chi custas aziendas big tech pariant dende signales de abertura e de inclusividade. In sos ùrtimos annos sas aziendas de sa Silicon Valley, difatis, aiant investidu meda in sos programmas Dei (Diversidade, ecuidade e inclusione). Sa dimanda est: a bi creiant? Como b’amus sa furriada ponende·si in fatu a sa boghe de s’incuilinu nou in Washington e no a sa sua ebbia. Duncas, a pustis de àere mudadu su nùmene de su Gulfu de su Mèssicu in Maps, Google sèberat de mudare fintzas su calendàriu.
Leave a comment