Cale diat dèvere èssere su benidore universitàriu de sa tzitade de Gràssia Deledda? Sa risposta la dìamus pòdere àere pregontende·nos cale diat dèvere èssere su benidore universitàriu sardu. E custas pregontas non movent petzi dae sa crisi de su Consòrtziu universitàriu nugoresu, dae sas dificultades de Tàtari e Casteddu (chi bi sunt e chi b’ant a èssere), ma finamentas dae sa crisi sanitària chi, paris a sos singiales de fragilidade at mustradu finamentas un’iscummissa possìbile: semus faeddende de s’impreu de sa didàtica digitale integrada chi at permìtidu a paritzos istudiantes de sighire su percursu cun profetu. A chie l’at permìtidu? A sos istudiantes traballadores, pro nàrrere, chi ant pòdidu “frecuentare” sas letziones abbaidende·si·las a sero; a sos istudiantes chi non podiant torrare a Casteddu o a Tàtari oramai sena allògiu privadu; a sos chi ant problemas familiares cun gente manna de atèndere. Sa pandemia no at a durare galu tempus meda ma sos problemas de sos istudiantes, de sas Universidades de Tàtari e Casteddu, de su benidore universitàriu nugoresu ant a abarrare. Pro ite, tando, non si pensat a una modalidade a mesu tretu intre sa presèntzia e su remotu in sas àulas de Nùgoro pro sighire sos cursos (sos chi si podent sighire) de UniCA e de UniSS? Sos pitzocos de cussos logos chi non s’ant a pòdere permìtere permanèntzias in sos duos cabos ant a èssere semper de prus e, de custa manera, at a èssere s’Universidade chi si nch’acùrtziat a issos. E pro ite non diat èssere cosa de giudu sa de cuntzepire (mancari in parte mìnima) sessiones de esame in Nùgoro cun sos dotzentes chi movent dae Tàtari o dae Casteddu carchi borta? Sa cosa si podet fàghere? Est possìbile a cuntzepire a Nùgoro che a sucursale de UniCA e UniSS? O pensamus chi a Nùgoro li bastent cussos pagos cursos pro si mantènnere? Carchi annu a como calicunu faeddeit de Universidade de sa Sardigna, ma nemos at sighidu s’allega pro motivos de “sovranidade” de sos rispetivos Ateneos e ca una fusione reduit a unu sas cadreas (comintzende dae unu Retore ebbia). No est chistione, duncas, de nos apellare a unu Baphomet chi, solve et coagula, iscontzet su chi b’amus pro fraigare su nou. Su chi b’amus s’est iscontzende de sesi. Duncas podet èssere afortidu cun Nùgoro. Pro ite tando Casteddu e Tàtari no abbàidant a s’Ortobene?
mp
Leave a comment