Cumpetèntzia regionale subra s’iscola contra a sos machìmines de s’istadu italianu

– de Franciscu Sedda –

Su Partito dei sardi espressat su sustegnu suo a sos insinnantes sardos chi si sunt mòvidos contra a sos machìmines de s’Istadu italianu e apògiat sas atziones de sa Giunta indiritzadas a fàghere a manera chi sos insinnantes nostros non depant disterrare dae s’Isula pro bìdere reconnotu su deretu a s’istabilizatzione.

Su tratamentu de s’Istadu a sos insinnantes nostros mustrat, in prus de una connoschèntzia fea de sa geografia (andare dae Milano a Verona no est sa matessi cosa de andare dae Casteddu a Roma), cantu siat netzessàriu a pigare a manera definitiva e cumpleta in manu sas cumpetèntzias in matèria de istrutzione. Petzi cun s’achirimentu de sa soberania prena a subra de s’istrutzione e a subra de s’organizatzione sua, gasi comente in sos cuntenutos suos, si podet fraigare un’iscola a mesura de sos sardos, siant issos insinnantes o iscolanos.

Su Partito dei Sardi l’at semper naradu e lu torrat a nàrrere. S’iscola in Sardigna depet èssere guvernada dae sa Sardigna e pro sa Sardigna. Pro creare una sotziedade prus culta e prus aberta; pro cosire sas fertas chi s’iscola italiana at fatu a sas cuscièntzias nostras, privadas in iscola de s’istòria issoro, de sa limba issoro, de sos ischires issoro, de su territòriu issoro; pro creare tzitadinos sardos atinados de sese e abertos a su mundu, prus istruidos e duncas cun prus oportunidades de realizatzione personale e de traballu in su benidore issoro.

S’at a nàrrere, galu una bia, chi, emmo, diat èssere bellu, a non dèpere prus pònnere mente a sos machìmines e ingiustìtzias de s’Istadu; eja, diat èssere bellu a tènnere un’iscola nostra a mesura de su progetu nostru de sotziedade de su tempus benidore; eja, diat èssere bellu ma…. sos gastos?

Bene. Sa proposta nostra est simple. Pigamus-nos s’iscola e pigamus-nos cumpartetzipatziones prus mannas. Antzis, pigamus-nos totu cussa parte de cumpartetzipatzione chi oe est tratesa dae s’Istadu.

Amus a fàghere duos pragheres mannos.

A s’Istadu Italianu, illebiadu (in prus chi dae sas figuras lègias) dae su dèpere istare a tratare cun custos sardos pedidores chi non si nde cherent andare dae sa terra issoro. A nois etotu, illebiados dae su dèpere istare in fatu a sos machìmines de un’Istadu chi non perdet ocasione pro nos regordare chi diamus fàghere mègius a fàghere a manera nostra si cherimus tènnere unu tempus benidore.

A in antis!

Franciscu Sedda

Segretario Nazionale Partito dei Sardi

(tradutzione a incuru de sa redatzione)