Cando in una bidda si faghet cultura cheret nàrrere chi cussa bidda est bia. E su 5 de abrile in Lùvula sa bidda at mustradu de èssere bia, e de renèssere a produire cultura, ca in s’alenu de custa cultura b’est in intro su sentidu de sa bida e de s’identidade de una bidda.
Su cuncursu Lùvula ti canto est a sa de tres editzione, comintzadu in su 2010 in su 2012 non s’est pòidu fàghere pro cajones de dinare, ma s’amministratzione in su 2013 at seberadu de torrare a pònnere impignu e duncas dinare in custu prèmiu.
Dae su 2011 cun su prèmiu de sa poesia b’est finas su prèmiu de fotografia in ue sos chi bi leant parte deviant pònnere impare sa fotografia issoro e sas poesias chi ant bìnchidu su prèmiu.
Unas chentu persones ant prenadu sa biblioteca e ant ascurtadu sos versos de sos poetas e sas paràulas de sos giuratos e de sas autoridades e ammiradu sas fotografias.
E dae cada paràula, dae cada màgine essiat craru su sentidu de limba e de identidade, chi in Lùvula est semper biu.
