Su Coordinamentu pro su Sardu Ufitziale s’atòbiat in assemblea generale, pro sa prima bia, sàpadu su 14 de custu mese in Santa Justa (Aristanis) a sas 17.00 in su Tzentru Tzìvicu de su comunu in pratza Othoca.
Su tìtulu de s’atòbiu at a èssere: <Sardigna 2014. Politica Linguìstica: Annu Zero?>.
Sunt invitados totu sos chi ant aderidu paris cun sos chi bolent aderire e finas sos chi diant chèrrere aderire, ma tenent dudas. E tando a partetzipare est sa manera mègius pro si nche bogare sos dubbios, abbarrare o si nch’andare.
CSU est unu assòtziu non formalizadu chi cheret printzipiare un’atzione de vigilàntzia, informatzione e cunfrontu cun e pro sa polìtica linguìstica de sa limba sarda e de sas àteras limbas de Sardigna.
Su chi paret a primìtzios est chi sa limba sarda non siat una prioridade urgente pro su guvernu regionale e chi s’arriscat de lassare colare su tempus sena atos cuncretos sena sos cales sos dannos a sa limba podent èssere posca sena mèdiu.
In custos ùrtimos deghe annos, guvernos de manca e de dereta, ant acumpridu una polìtica linguìstica chi at produidu efetos bonos e finas una ‘rinàschida’ de sa chistione. Sos resurtos de custa revesa de sa limba si sunt bidos finas in sas polèmicas ùrtimas in contu de istandardizatzione e assentos dirigentziales regionales.
Su prùere de sos polemistas paret negativu, ma imbetzes est, finas sena bòlere, su sinnale pretzisu chi sa chistione de sa limba est bia, carculada e presente in s’opinione pùblica sarda. Su chi tocat e merèsset est chi bi cheret atentu e finas una capatzidade detzisionale pro parare fronte a unu beranu nou de sa limba chi non podet e non depet mudare in atòngiu primidiu.
Comente narat su documentu fundativu de CSU s’istadu de sa chistione apessamentat. Sa situatzione generale de sa polìtica linguìstica oe in Sardigna (mancat una lege ispetzìfica pro s’avaloramentu de su sardu; mancat su Pianu triennale de is interventos de promovimentu e avaloramentu de sa cultura e de sa limba sarda cunforma a s’art. 12 de sa L.R. 26/1997; bolet annoadu s’Osservatòriu regionale pro sa cultura e sa limba sarda cunforma a s’art. 5 de sa L.R. 26/1997) e una filera de cosas acontèssidas in is ùrtimas chidas (iscadèntzia de s’incàrrigu de su Diretore de su Servìtziu Limba e Cultura Sarda de sa R.A.S.; aprovatzione de su Patu de istabilidade internu de sa R.A.S. chi no assignat pro is interventos in favore de sa limba sarda sa prioridade de ispesa chi ddis deghet; perìgulu de acorpamentu de is servìtzios de sa R.A.S. vacantes e duncas fintzas de su Servìtziu Limba e Cultura Sarda) faghent nàschere – a manera legìtima – prus de unu pistighìngiu in contu de su benidore de sa limba sarda, pro more ca non si bidet oe unu disignu craru de programmatzione de interventos pro dd’avalorare.
De custu e de àteru amus a resonare in Santa Justa. S’isterrida at a èssere a incuru de sos promotores, posca ognunu podet faeddare e nàrrere sa sua.
Non manchedas.
——————///////————–
Su Coordinamentu pro su Sardu Ufitziale organizat s’assemblea generale.
Su tìtulu de s’atòbiu at a èssere: <Sardigna 2014. Politica Linguìstica: Annu Zero?>.
14.06.2014 Santa Justa (Aristanis),
Tzentru tzìvicu comunale
Pratza Othoca (a palas de su comunu)
H. 17.00
Leave a comment