In sa prèiga de Pasca Manna su patriarca latinu de Gerusalemme, sa Beatitùdine Sua Pierbattista Pizzaballa, no at pòdidu fàghere a mancu, bida sa situatzione tràgica chi est bivende sa Terrasanta, de fàghere unu riferimentu a s’atualidade polìtica.
At naradu, intre sas àteras cosas, ca «non semus illusos. Ischimus it’est capitende in mesu a nois e in su mundu e non tenimus isperàntzia meda chi sos guvernantes potzant agatare solutziones chi a dolu mannu nostru parent semper prus a tesu. E non podimus no espressare su pistighìngiu nostru pro un’impeoramentu de sa situatzione polìtica e de su disastru umanitàriu puru chi est capitende, massimamente in Gaza…»
E at agiuntu: «Finas si sunt meda sas peleas e sas tribulias chi nos afligint, duncas, cherimus afirmare cun fide serena e cun seguresa crara chi nudda nos tenet inserrados in sos sepurcros nostros, chi semus Crèsia bia, chi non s’arrendet in dae in antis de sas rocas postas in su caminu nostru. Su Vangelu nos invitat a nos abèrrere, a abbaidare prus a in ie e a cùrrere, che a sas fèminas e sos discìpulos, a annuntziare ca nudda est prus bellu de bìvere cun Deus Resuscitadu, oe puru, in totue, mancari siat: in Gerusalemme, in Betlemme, in Nazareth, in Amman, in Nicosia e in Gaza puru».
A impeorare sa situatzione giai mala de sos palestinesos, in custu casu massimamente de cuddos chi sunt cristianos, est istada sa detzisione de su Ministru de sa Seguresa Pùblica de Israele, Itamar Ben Gvir, de limitare su nùmeru de fideles chi dae sa Tzisgiordània podiant assortire a sos logos santos pro Pasca. Sas autoridades ant dadu difatis petzi 6000 permissos e pro una chida ebbia.
Su ministru Ben Gvir est connotu finas pro sas decraratziones fatas duos annos a como, cando sa politzia aiat arrestadu bator giudeos chi ruspiaiant contra a sos cristianos in Gerusalemme. Segundu su ministru non fiat unu crìmine giai chi est cunsiderada una traditzione ebràica.
(gianni muroni)
Leave a comment