Criminalidade in Sardigna: Aristanis sa mègius, Tàtari sa peus

Comente onni annu, est essinde a campu sa chirca de su Sole24Ore chi sestat datos a subra de sa sotziedade de s’Istadu italianu e proa a pònnere in una classìfica sas provìntzias (inoghe). Si in Itàlia sa tzidade cun prus delitos denuntziados e iscobertos est Milanu, sighida dae Rìmini e Roma. In Sardigna sas bator tzitades sunt totu cantas in logu bonu cun, pro su prus, pagos crimines, ma de genia unu pagu diferentes cambiende giassu.

Sa prus segura, non de sa Sardigna ebbia, ma de s’Istadu intreu, est Aristanis: ùrtima de sa classìfica generale pro cantidades de crìmines. Sos reatos econòmicos sunt sos chi mancant de prus; pagas furas, pagos irrobatòrios e belle nudda de trassas informàticas. Su chi b’est de prus sunt sos crìmines violentos: ochiduras fatas e proadas, chèrfidas e colposas, ma fintzas minetzas e surras. Prus o mancu sa matessi situatzione de Nùgoro, chi at prus crìmines violentos e pagos econòmicos, ma cun s’annanta de tràfigos de droga. Semus semper in bassu meda de sa classìfica generale, sa positzione 86, ma est sa tertza provìntzia pro ochiduras in s’Istadu intreu e in sas primas deghe pro dannos fatos cun voluntade, ochiduras colposas e proadas.

In Casteddu sa situatzione est unu pagu mègius de Nùgoro, cun in generale pagos crìmines. Pagos omitzìdios e reatos violentos e pagas furas, fintzas si sunt creschende. B’at, comente in àteras tzitades, unu pagu de prus de droga, isfrutamentu de sa prostitutzione e dannos chèrfidos.

Sa situatzione peus de s’ìsula intrea est in Tàtari, cun bintisès positziones in prus de Nùgoro. Cun sos nùmeros publicados no ispantat sa cuntierra chi b’at a subra de sa gestione de su tzentru istòricu de custas dies, a pustis de sos isparos intre duas persones, e sa fiacolada de istasero pro pedire un’aficu prus mannu de su bighinadu prus antigu de sa tzitade. In sos datos si podet bìdere comente sunt artos sos crìmines violentos (ochiduras cherfidas e proadas), minetzas, e surras. Ma fintzas sos datos de sas iscùrpidas e de sas violèntzias sessuales sunt sos prus artos, e de meda, de sa Sardigna intrea. B’at de nàrrere chi in custos datos non intrant petzi Tàtari, ma fintzas Terranoa, s’Alighera, Purtu turre e totu sas biddas.

(redatzione)