Cras inTonara (NU) su Coordinamentu pro su Sardu Ufitziale faghet sa Die de sa Sardigna cosa sua. Apuntamentu a mangianu a sas 10 e 30 in su tzentru polifuntzionale de su comunu in via della Regione. Su tìtulu est “Sa Die 1794-2015: no at cambiadu nudda” chi cheret finas denùntziare su discùidu de su guvernu acadèmicu regionale pro s’identidade natzionalitària e linguìstica de sa Sardigna.
Su programa regionale presentadu in custas dies difatis est partu, a pustis de unu muntone de ritardos e discùidos, fatu in presse, pagu credìbile e finas contraditòriu. Unu collage de initziativas ognuna pro contu suo sena assentu e lògica cun sa manifestatzione e cun s’assessoradu chi si nd’est fatu mere de fainas chi podiant andare semper e cando a sa sola.
Ma lassamus pèrdere. Ognunu at a pòdere giudicare cun sa conca sua.
Sa manifestazione de su Coordinamentu Sardu Ufitziale at a èssere una cosa sèria e in lìnia cun s’ispìritu istòricu e polìticu de custa festa. Pro cussu ringratziamus meda Manuela Ennas e Isabella Tore de su grupu “S’istòria sarda in iscola” chi ant a fàghere duas relatas pro ammentare sos fatos istòricos de su 1794 finas chircende de dare indicos de comente custu si potzat insingiare in iscola.
No at a mancare su saludu de sas autoridades comunales, de s’assemblea diretiva de su CSU e finas unu dibàtitu abertu a subra de sas chistiones de polìtica linguìstica e identitària de custos meses. Finale a incuru de su comunu cun sa mùsica e su cantu de su coro “Peppinu Mereu”.
Pràngiu sotziale a prètziu fissu de 16 èuros in su Ristorante il Castagneto a su cale est mègius a si prenotare telefonende a sos nùmeros Tel 0784 610149 – 610005
CSU proponet una festa de unidade natzionale, aberta a totus sos chi pensant chi sa Sardigna siat una natzione e apat una limba sua. Una festa, prus chi non una gerronada polìticu-culturale, mancari chi no ant a mancare sos momentos de livellu.
Est però un’annada mala a beru pro Sa Die de sa Sardigna. Sa Regione no at renèssere mancu a ispendere totu sos 160 mìgia èuros istantziados ma petzi 40 mìgia de un’afidamentu diretu fatu a una dita. In sa prima botza de proposta de bilantzu a su Cussìgiu, sa Giunta (finas s’assessora Firino tando) no aiat proposto mancu un’èuro pro la fàghere. Sunt istados sos soberanistas, mesches Il Partito dei Sardi, a cumbatare in Cussìgiu pro torrare a pònnere un’emendamentu de 200 mìgia èuros. Aproadu, pariat cosa fata. Ma, una bia chi s’allegadu tècnicu ets lòmpidu in Cussìgiu, su dinare non bi fiat. Faddina o sabotàgiu? Non s’est mai cumpresu. Fatu istat chi b’at chertu duos meses de chèscias, protestas e documentos polìticos in antis de lòmpere a como.
E comente aiat antetzipadu Limba Sarda 2.0 s’est verificadu su fatu chi a sa Die sunt istados postos temas chi non b’intrant nudda. Cosas chi in sos annos dae su 2008 a su 2014 non fiat acuntèssida. Un’operatzione seguramente mòvida dae chie in intro de sos ufìtzios no at mai bajuladu su significadu natzionalitàriu de sa Die e tando at semper chircadu de b’ammesturare àteros argumentos chi non bi intrant nudda. Una faina italianista de “amasedamentu” de sa festa.
Ma forsis non resessent a fàghere mancu cussu. Pro nd’ischire de prus leghe finas http://www.vitobiolchini.it/2015/04/24/se-pigliaru-naviga-a-vista-la-sardegna-va-alla-deriva-sanita-expo-cultura/.
Leave a comment