Isio Saba, fiat unu fotògrafu e promoter otieresu nàschidu 81 annos a como e mortu su 2013. Fiat una persone nòdida in su mundu de su jazz italianu e internatzionale. Ligadu, comente fiat, a Lester Bowie, Don Cherry, Nanà Vasconcelos e a sas esperièntzias che a sa de s’Art Ensemble of Chicago. Òmine de primore aiat co-fundadu su festival “Jazz in Sardegna”. Tando no est in de badas a lu ammentare cun sa faina chi isse teniat prus in coro, sa mùsica, intritzada però a sa poesia, un’arte chi dae s’antigòriu andat in paris cun sas notas. S’apuntamentu annuale ammanigiadu dae s’assòtziu culturale “Sa Ena” cun su contributu finantziàriu de su “Prèmiu Otieri de Literadura Sarda”, at èssere cras dae sas 8 de sero in su teatru tzìvicu, intrada a s’indonu.
S’ispetàculu at a èssere presentadu dae Antonio “Pippo” Saba. In su palcu su New trio (Dario Piccioni, contrabbassu e mùsicas; Jordan Corda, vibràfonu e Francesco Merenda, bateria). In antis de su live de custa trìbide at a tocare a sos otieresos Jame’s Juice (Paolo Scodino, boghe e chiterra; Michele Falzoi chiterra; Emilio Scodino, tastieras; Luca Meledina, bassu e Piergianni Meledina, bateria).
Su pùblicu, in prus, at a pòdere ascurtare su mègius de sa poesia sarda chi arrichit s’archìviu de su “Premio Ozieri” lòmpidu a sa de 64 editziones suas. Cussos versos, pro s’ocasione, ant a èssere resados dae sas boghes de duos letores de primore: sos giurados de su Prèmiu, Cristiano Becciu e Clara Farina.
Isio Saba est istadu un’esempru de comente si podet essire dae s’ìsula, sena mutzare mai de su totu sas raighinas e sos ligàmenes, ma antzias batende a dae segus sos inditos e sos imparos chi in fora si sunt incungiados, fraighende cultura noa e richesa de pensu.
Gabriele Tanda
Leave a comment