In custu perìodu de covid – baddu a dd’ischire cantu at a durare – is origras nostras ant intesu unu muntone de contos complotaros-negatzionistas. Amus intesu chi «su sole morit a su virus» e chi duncas tocaiat a abèrrere s’ìsula a is turistas sena ddos assuconare cun patentinos e àtera documentatzione; amus intesu (e lèghidu in carchi giornale) chi is migrantes sunt «immunes a su virus» e chi duncas tocaiat a dare cara a is complotos contra a is italianos; amus intesu chi is asintomàticos «non nos ddu cundint su covid» sena cunsiderare is pàrreres de sa comunidade iscientìfica (galu dudosa) e sa distintzione intre asintomàticos, presintomàticos e paucisintomàticos. Imoe chi carchi migrante (ma non fiant immunes?) nche lompet a Sardigna (atraessende su Mediterràneu pighende·si unu sole chi mancu in praja ddu pigamus) e chi est fintzas asintomàticu, acò·lu s’abbolotu. Un’abbolotu cajoadu dae polìticos «contra a is cadiras» ma chi in cussas cadiras ddoe sunt sètzidos dae tempus meda; dae polìticos chi ant contribuidu a fàghere a bìculos s’economia e sa sanidade ma chi imoe bident in custos pagos cristianos sa cajone de sa ruina generale. Traballu mannu ddoe bolet, ca custas allegas – fintzas pro more de custos campiones de sa polìtica chi ant fatu a bìculos s’istrutzione – nche sunt in intro de su sentidu comune. Passèntzia manna ddoe bolet, finamentas ca custas tontesas ddas intendimus a parentes, amigos, in domo, in is tzilleris, in internet.
màuru piredda
Leave a comment