Sa Corea de su Sud est bivende momentos delicados dae unu punto de bista polìticu. Su 3 de nadale coladu su presidente Yoon Suk Yeol aiat proclamadu sa lege martziale, suspendende su parlamentu e mobilitende s’esèrtzitu.
Su corpu de istadu però no est duradu e su 14 de su mese s’Assemblea Natzionale dd’at suspèndidu dae s’incàrrigu.
Como sa Corte Costitutzionale at a dèpere istabilire si sa suspensione cheret cunfirmada o nono. Sos giùighes tenent 180 dies pro detzìdere. S’in casu cunfirmant sa suspensione de su presidente ddo’at àteras 60 dies pro fàghere àteras eletziones presidentziales noas e elègere aterunu capu de istadu.
In s’ìnteri, s’ùrtima die de s’annu est arribadu su mandadu de arrestu e de percuisitzione de unu tribunale contra a su capu de istadu.
Sa motivatzione de sa detzisione giuditziàraia est chi Yoon non s’est presentadu in tribunale pro s’interrogatòriu. Su polìticu at retzidu s’avisu tres bortas e tres bortas no at rispostu a sa cunvocatzione.
Militantes de su partidu de Yoon però ant manifestadu in dae in antis de su palatzu presidentziale in favore suo. Pensant chi sa detzisione de ddu suspèndere siat illegale e acusant su Partidu Democràticu, a s’opositzione, de àere provocadu finas custa detzisione de sos giùighes.
Yoon est istadu elègidu a sa presidèntzia de sa Rebùblica de s’istadu de s’Oriente atesu in su 2022. Faghet parte de su PPP, partidu populare de destra.
No est istada una fine de annu trancuilla pro sa Corea de su Sud. A prus de su caos polìticu, su 29 de nadale ddoa’t àpidu un’intzidente aèreu grave.
Un’aparèchiu cun 181 persones, chi 175 fiant biagiadores, est rutu in antis de aterrare in s’aeroportu de Muan. Fiat unu boeing de sa cumpangia coreana Jeju Air e beniat dae Bangkok. Sunt mortos in 179. S’ipòtesi est de unu guastu istruturale.
(gianni muroni)