de Maurìtziu Sale Buinu
Sa connoschèntzia ingendrat cunvintziones e cumbinchimentos, ma mai tzertesa e, galu prus pagu puru, veridade. A custa, a sa veridade, li dat acunnortu su meledu filosòficu, semper custrintu, corale e semper indiritzadu duncas, dae nois a nois matessi. Si nche diamus bòlere iscarrigare a inoghe a intro totu sas fontes de sa connoschèntzia nostra, in ònnia dibata, in onni cunfrontu, pro afortiare su sentidu nostru, cantu prus in presse sos serbidores de sa retza diant andare in “tilt”, pro la nàrrere a s’inglesa. Istemus·nde prus chi non seguros.
Sighende custa nota chi apo chertu pònnere in abertura, deo puru chèrgio fàghere un’anàlisi de su chi at naradu s’assessore Firino sàbadu coladu in Neunele.
S’arresonu chi at fatu fiat pràghidu, fungudu e longu meda, pertocaiat belle totu su chi dùrriat a in tundu de sa Limba, comente a nàrrere: a gosi nche fatzo unu biàgiu ebbia e no lu fatzo de badas. Mi nche catzo totu sos pensamentos e bi nche los colo a issos!
E gasi etotu est istadu ca a pustis chi si nch’est andada , a meledare semus arrumbados nois.
Duas chistiones m’ant corpadu s’atentzione e sa cussèntzia e penso chi custu siat su chi issa nos apat chertu nàrrere:
1)Firino (s’Assessore) diat chèrrere serbare su traballu fatu finas a como e amparare totu sa gente chi traballat fatu de sos ufìtzios territoriales. At allegadu de prorogare pro un’annu su Pianu Triennale chi est iscadidu unos cantos meses a como. Non creo si potzat fàghere pròroga, ma sas maias in contu de polìtica sunt medas e duncas non m’ispanto prus.
2)Firino (sa Polìtica) at naradu in suspu, ma mancu meda, chi pro su chi pertocat s’istandard,duncas sa LSC, issa sa botza bi nche la diat chèrrere colare a su Consìgiu, comente a nàrrere: Chi s’iscorrent issos.
A pustis at chistionadu de àteru meda , ma a bisu meu custas duas sunt sas chistiones de importu, su restu est una coreografia giai connota e chi, si devo èssere sintzeru, un’agigu mi nch’at infadadu puru.
Semper sighende sa premissa dia chèrrere annànghere un’àtera cosighedda: nos devimus ammentare ca in Regione, in ue si maniestant sos afares chi pertocant totu sa Sardigna e totu sos Sardos, non bi sunt petzi su Presidente, sos Consigieris e sos Assessores.
B’at totu un’àtera genia de persones potente meda, a bias de bonu notu e a bias malintragnada, chi est semper in cue, legisladura cun legisladura,annu cun annu, die cun die, maniestende, consigiende,a bias taparatende e imbolighende prus de chie si siat ,intre sas categorias chi apo numenadu a printzìpiu:sos Buròcrates.
E cussos sunt fortes, tenent un’influèntzia chi a bias ghetat umbra subra a totu sos àteros .
Sa chistione est dìliga e , a bisu meu su CSU , devet afortiare s’immàgine e s’istrutura sua pro los pòdere afrontare e, si b’at a àere bisòngiu, finas a los cumbatare totus in pare, a su momentu giustu.
Como su Coordinamentu est ufitzializadu,tenet sa “beneditzione” de Firino chi est bènnida a nos chircare a sa sola,sena sirenas e sena iscortas biaitas. Ammentemus·nos ca nois l’amus preguntadu a nos colliret a s’assessoradu e issa imbetzes at fatu meda de prus:est bènnida a s’addòbiu e sena chi nois l’apemus fatu perunu cumbidu ufitziale e pro custu deo li torro gràtzias.
E a su matessi tempus li torro gràtzias a Salvatore Cau su Sìndigu de Neunele, e a totu sos reladores , a Nicolau Migheli, a Diegu Corràine, a Vito Biolchini, a Roberto Carta e a Pepe Coròngiu chi, cun s’istèrrida issoro, ant donadu un’inghitzu fungudu e profetosu a sa dibata.
A sos àteros addòbios e chi siant semper mègius!
foto de Angelo Canu
Leave a comment