Mancari sas tendèntzias monopolistas in s’economia atuale – chi sunt bene sintetizadas dae su chi at naradu su fundadore de PayPal Peter Thiel – in su mundu de sos meres de s’hi-tech sa cuncurrèntzia non mancat. Est dae unu pagu de tempus chi nos contant de su disafiu de Jeff Bezos in su campu de sas connessiones satellitares controlladas dae Elon Musk. Dae Amazon sunt difatis annuntziende s’artziada a s’ispàtziu de su primu grupu de satèllites su Project Kuiper suo «marchende unu passu importante – narant – in sa missione de frunire una connessione lestra e afidàbile a sos clientes e a sas comunidades de totu su mundu».
Custu diat dèvere èssere petzi su cumintzu, sende chi Amazon est programmende unas otanta missiones cun deghinas de satèllites in s’òrbita terrestre pro pònnere paris una costellatzione a tretu de cumpètere cun sos trenitos Starlink. Cun sa prima missione KA-01 (sigla de su nùmene prus cumpletu Kuiper Atlas 1), sos de Bezos nch’ant a giùghere in artu 27 veìculos gràtzias a su coete Atlas V de sa United Launch Alliance. Su decollu est programmadu pro mesudie de mèrcuris su 9 de abrile dae Cape Caravenal, in Flòrida, e s’artària chi ant a lòmpere est de 600 chilòmetros dae sa terra.
Andet comente andet, s’idea est sa de frunire servìtzios de connessione giai a concruos de annu pro cale si siat parte de su praneta. «Non nos importat comente s’at a acumprire sa missione – at naradu su vitzepresidente de su progetu Rajeev Badyal –, custu est petzi su comintzu de su biàgiu nostru. Amus progetadu unos cantos satèllites de comunicatzione intre sos prus avantzados e cada artziada est un’oportunidade pro annànghere prus capatzidade a sa rete nostra. B’amus totu cantu pro imparare adatende·nos in su mentres chi nos preparamus a missiones noas pro sos annos imbenientes».
Gianfranca Orunesu
Leave a comment