Foto leada dae vaticannews.va
Sos primos tres iscrutìnios no ant dadu èsitu perunu. Fumada niedda eris, a pustis de sa prima votatzione, e fumada niedda custu mangianu 8 de maju a pustis de sas primas duas de sas bator votatziones in programma ogna die, finas a s’eletzione.
Difatis ddo’at a àere duos iscrutìnios a mangianu e duos a sero. Sas primas votatziones, sas de sas 10,30 e sa de sas 17,00, oràrios indicativos, ant a produire, s’in casu, petzi sa fumada bianca. In casu de votu negativu su resurtadu negativu no at a èssere signaladu e at a tocare a isetare sa segunda.
Totus est andende cunforma a sa traditzione. Eris sos 133 eletores, una borta intrados in Conclave in sa Capella Saistina, ant fatu su giuramentu de ritu. Ponende sa manu in su vangelu ant pronuntziadu su nùmene issoro in latinu a pustis de sas paràulas Et ego cardinalis, sighende a coa cun spondeo, voveo ac iuro sic me Deus adiuvet et haec sancta Dei evangelia quae manu mea tango, est a nàrrere “promito, fatzo votu e giuro, de gasi m’agiuent Deus e custos santos vangelos chi toco”.
Carchi cardinale at manifestadu una familiaridade cun sa limba de sa Crèsia non pròpiu assoluta. De signalare finas carchi diferèntzia de pronùntzia, cun sos cardinales de àrea germànica, ma finas su cardinale italianu Pizzaballa, chi ant lèghidu Evangelia cunforma a sa pronùntzia clàssica, cun sa oclusiva velare sonora, chi in sardu, in antis de sa vocale e, est rapresentada dae su digramma gh.
Sa majoria imbetzes at impreadu sa pronùntzia eclesiàstica, chi in custu casu previdet s’africada postalveolare sonora, cun una pronùntzia chi currispondet a sa de s’italianu.
Semper in latinu depent, in antis de dare s’ischeda, retzitare sa fòrmula: Testor Christum Dominum, qui me iudcaturus est, me eligere in Summum Pontificem eum, quem secundum Deum iudico eligi debere, est a nàrrere “Testimòngio in dae in antis de Cristos Segnore, chi m’at a giugare, de elègere a Summu Pontìfitze su chi apo a seberare de votare segundu Deus”.
(gianni muroni)
Leave a comment