A preguntare a una intelligèntzia artifitziale generativa che a Gemini, ChatGPT o Copilot non paret difìtzile: cale si siat dimanda li fagas, semper t’at a torrare imposta. Àtera cosa est a lograre pròpiu su chi ti bisòngiat. Ca no est sa matessi cosa a li pedire chi “iscriat unu testu a pitzu de sas possibilidades de sa IA” o chi “elaboret una ghía detalliada de comente impitare sa IA in un’ ambiente imprenditoriale, chi at a èssere publicada in unu mèdiu de comunicatzione generalista”.
Sa crae est sa forma de fàghere sas dimandas. Sunt sos chi in inglesu si narant “prompts” e in sardu “rechestas”, e chi sunt essentziales pro definire su tonu, s’istile e su detàlliu de sos testos, imàgines o presentadas generadas dae una IA.
Pro chi una “rechesta” siat cumpleta, bi cherent, tando, custos ses elementos essentziales:
-
A faeddare a una IA comente chi siat un’esperta in unu campu cuncretu: “Faghe custu comente chi sias unu professore”; o unu giornalista, o unu responsàbile de marketing, o istudente, etc.
-
A ispetzificare su cuntestu: “So unu giornalista chi est iscriende un’artìculu de comente elaborare sas mègius “rechestas” de presentare a sas intelligèntzias artifitziales che a tie. Tèngio de agatare unu tìtulu galanu pro inditare s’otimizatzione pro sos motores de chirca, a manera de publicare s’artìculu in sa setzione de tecnología de unu periòdicu istatale”.
-
A definire s’obietivu: b’at de crarire a sa IA si cheres iscrìere un’artìculu, un’istùdiu acadèmicu, unu curreu eletrònicu, o fàghere una presentada, un’ischema o cale si siat àtera casta de traballu.
-
A determinare su registru. Su limbàgiu de sos cuntestos acadèmicos o de traballu no est su matessi de su de sas retzas sotziales. Duncas si podent dare esempros a manera chi si baset subra de custos: “Prepara tres testos descritivos tenende contu de custos”.
-
A disinnare s’istrutura: “Tèngio bisòngiu de unu testu chi cumintzet cun un’istèrrida crarende ite est su metaversu, sigat enumerende in forna detalliada, e cun esempros, sas aplicatziones suas e agabbet cun sos disafios chi lis parat fronte”.
-
A non preguntare totu a una borta. Pro nàrrere, si cheres disinnare una campagna de marketing, sa prima cosa est a preguntare cale est su protzessu pro nde elaborare una, e pustis cales sunt sos àteros passos chi bi cherent.