Custas dies s’emergèntzia de sos fogos e sa crèschida de sos malàidos de Covid, at lassadu logu in sas pàginas a dae in antis de sos giornales petzi a un’àtera genia de noa: is mortos pro sos intzidentes de vetura. Isceti in is ùrtimas oras sunt mortas tres persones pro neghe de atapadas malas, pro su prus frontales in istradas in fora de biddas e tzitades.
Sa crèschida però non est acontèssida in Sardigna ebbia. Totu s’Europa at bidu sa cantidade de custas disauras ismanniende. Sa neghe, narant sos istudiosos, est de sa serrada pro su Covid. Gente meda at ghiadu pagu e nudda cando fìamus tancados, e finamentas chie at sighidu a lu fàghere s’agataiat in carreras meda prus bòidas de su sòlitu. Sos pidinos pro sos cambiamentos, sa timoria de sa crisi, posca de un’annu e mesu, at istracadu chie si siat. S’istare intro at avesadu sa gente a mantènnere su telefoneddu semper in manos, e cando unu est ghiende bastat chi l’intendat ischiliare o movende·si e a si isagherare est prus fàtzile. In prus inoghe sas carreras sunt fràzigas e como b’at unu calore chi mènguat sa limpiesa de su meledu e faghet faddire prus meda.
Bisòngiat chi sas istitutziones còmpident de prus, mescamente pro s’impreu de sos telefoneddos, e pòngiant manu a sa calidades de sas bias de comunicatzione, ma su chi podet megiorare de a beru sa situatzione est a pònnere mente a su chi s’est fatende e a si serare chi como b’at unu pagu prus de arriscu.
(redatzione)
Leave a comment
Comente mai sos incidentes? È scoppiata la voglia di normalità?
Sinnale chi semus torrendhe a sa “normalità”!!!
Ma neune si atrivit a fàghere sos contos de totu sos disastros, cun mortos, feridos, istopiados a totu vida, meses e meses de ispidale, distrutzione de benes, de su virus de custa “normalità” (e corona virus, mih, prus amantiosu pro atacare a sos zòvanos apenas apenas ómines fatos!!!). S’indústria de sos incidentes, de sa zenia “industris” de sa morte, est fàtzile chi siat una de sas prus mannas “per occupazione, posti di lavoro” e via… afariendhe.
Un’istúdiu chi cun sa classe de 2ˆ média e sighindhe in 3ˆde su 01/10/2002 a su 30/09/2003 faghindhe su rilievu die cun die(fintza de sos meses de vacàntzia de s’istiu) in ambos giornales L’Unione Sarda e La Nuova Sardegna at dadu custos resurtados (inoghe sos mortos , ma cantos a meses intreos in ispidale e fintzas istropiados a totu vida!!!)
Mortos de edade prima de sos 18 annos: 7;
mortos de s’edade tra 18 e 32 annos: 69;
mortos de s’edade tra 33 e 47 annos: 38;
mortos de s’edade tra 48 e 63 annos: 21;
mortos de edade superiore a sos 63: 21.
In d-unu solu annu e solu in Sardigna!!!
Benemindhe de “progresso”!!!