Cinque è il numero perfetto est sa pellìcula de esòrdiu de Igort, nùmene de arte de Igor Tuveri. Casteddaju, nàschidu in su 1958, Igort est connotu in campu fumetìsticu, in ue at cumintzadu a traballare giai a sa fine de sos annos ‘70. At collaboradu, intre sas àteras, cun s’editoriale frantzesa Les Humanoïdes Associés e sa giaponesa Kodansha e dae una pariga de annos est diretore editoriale de sa rivista Linus. In su 2017 at fundadu sas editziones Oblomov, dedicada a libros a fumetos.
Su filmi est sa traspositzione de su fumetu omònimu realizadu dae issu etotu e publicadu in su 2002 cun sa Coconino Press, sa prima creatura editoriale sua.
Ambientadu in Napoli in su 1972, contat de unu sicàriu lòmpidu oramai a s’edade de sa pensione chi torrat in atzione. Est unu misturu de pellìcula de gangster e de cummèdia e in prus est finas un’omàgiu a sa cultura partenopea, giai in su nùmenes de sos duos personàgios printzipales: Peppino e Totò.
Custos antieroes si movent in una tzitade noturna e oscura. S’ùnicu mundu issoro e chi intrant in cuntatu est su de sa criminalidade.
Su protagonista est Toni Servillo e sos ruolos secundàrios sunt afidados a Carlo Buccirosso e a Valeria Golino.
Sa pellìcula, essida in su 2019, at tentu crìticas pro su prus positivas, massimamente pro sa resa gràfica e pro s’originalidade, chi nde faghent un’òpera diferente in su panorama tzinematogràficu italianu de custos annos. At bintu su prèmiu David di Donatello 2020 in sa categoria a sa mègius atora non protagonista, assignadu a Valeria Golino.
No est sa prima esperièntzia assoluta de Igort in su tzìnema, bidu ca a’autore aiat giai traballadu comente iscenegiadore a tres pellìculas e nemmancu sa prima in aterunu campu artìsticu, cunsiderada s’atividade musicale in sos annos ‘80, cun Slava Trudù e àteras incarnatziones.
Cinque è il numero perfetto est produidu dae Propaganda Italia, Jean Vigo Italia e Rai Cinema. In sa pellìcula ddo’at aizu de Sardigna puru cun una parte de sas iscenas giradas in Crabas.
(gianni muroni)
Leave a comment