Eris Microsoft at lòmpidu 50 annos. Tundos tundos. Dae su 4 de abrile de su 1975 a su 4 de abrile de su 2025 s’azienda de Redmond at lassadu sa trata sua in su mundu de sa tecnologia e de s’informàtica. Non cun Windows ebbia in sas versiones suas (unas cantas bonas, àteras nono) ma finamentas cun Ms-Dos, cun Messenger e cun àteras fainas. Comintzende dae Altair Basic, su primu sistema operativu chi aiat isvilupadu cun s’assotziadu suo Paul Allen, mortu su 2018 cando aiat 65 annos.
E pròpiu de Altair Basic, in ocasione de custu anniversàriu, Bill Gates at annuntziadu sa difusione intrea de su còdighe mitza. In su blog suo, de custu sistema operativu nd’at contadu s’istòria: dae cando l’est bènnida s’idea a pustis de àere lèghidu un’artìculu de su minicomputer Altair 8800 in sa rivista Popular Electronica, a cando issu e Allen cuntateint a sos produtores de cussa màchina pensende a unu software pro su controllu de s’hardware. Pro resessire in s’impresa impreeint su linguàgiu Basic finas a nde fàghere un’aina cumpatìbile cun sos minicomputer mentovados. Como cussu còdighe, chi Gates li narat «su prus ispantosu chi apa isvilupadu», est possìbile a l’iscarrigare. Est a s’indonu e pro totu cantos dae custu ligàmene.
Est un’iscansione pdf cun risolutzione arta dae s’imprenta de pabiru. Semus faeddende de 157 pàginas (belle 30 metros de istèrrida) chi sunt su resurtadu de dies e notes intreos colados imbèrghidos in sa creatzione. Est gasi chi est nàschida sa prima grandu proa de Bill Gates e de Paul Allen, cando chi sa sotziedade teniat galu unu tratigheddu intre sas paràulas Micro e Soft. Chimbanta annos cherent colados. Chimbanta annos cherent lòmpidos. E finamentas sos chi non sunt amantiosos de sos produtos Microsoft reconnoschent a custa croba de informàticos sos mèritos chi tenent.
Gianfranca Orunesu
Leave a comment