Fiat fìgiu de Sarvadore, pro parte sua fìgiu de Nigola de Arbarèe, canònicu in Lérida e in Salisbury, fìgiu pro parte sua de Ugone II, giùighe de Arbarèe, e de Costantza Cubello, nòbile de orìgine valentziana. At seberadu su sambenadu de sa mama, Cubello apuntu, renuntziende a sos deretos de sutzessione dae bandas de su babbu, (Arbarèe – Bas-Serra), e duncas a su tìtulu de giùighe de Arbarèe, colende pro cuntzessione a su de marchesu de Aristanis e conte de su Gotzeanu.
Intre su 1407 – s’annu chi est mortu su giùighe Marianu V – e su 1409, est istadu regente de su giuigadu de Arbarèe, pro èssere destitudu, in su cumintzu de ghennàrgiu de su matessi annu, dae su visconte Guglielmu III de Narbona. A pustis de sa Battalla de Seddori ruinosa, Lenardu Cubello at fatu torra a regente in s’ìnteri chi Guglielmu fiat tzucadu a Frantza pro pedire aguudu. A pustis chi su catalanu Martinu su Giòvanu, chi aiat bintu sos sardos in Seddori, est mortu forsis pro sa malàera, Cubello, assediadu in Aristanis, s’est rèndidu sena gherrare. Pagas dies a pustis, su 29 o su 30 de martzu , at sutiscritu unu tratadu in ue si decraraiat chi Guglielmu III de Narbona fiat decàidu, e tzediat a sa Corona de Aragona totu sos territòrios chi poessediat. In prus, su capituladu li daiat su tìtulu de marchesu de Aristanis, pro issu e pro sos discendentes suos. Deretu a pustis de sa frimma de su capituladu, Cubello at cumintzadu a ismanniare sos domìnios sos. In trìulas de su 1410 l’ant cuntzèdidu, comente pìngiu pro unu prèstidu de 5.000 alfonsinos a su re, su Monteagudu e, in su 1413, su Guilcer e su Barigadu, semper comente pìngiu pro unu prèstidu a su soveranu. In prus teniat finas su domìniu de su Mandrolisai e de sa Barbàgia de Ollolai, cuntzèdidos a sa pobidda Chìriga Deiana in cantu erede de su babbu Giuanne.
In su 1422 su re l’at cuntzèdidu su tìtulu de conte de su Gotzeanu, faghende·lu devènnere su feudatàriu prus poderosu de su Rennu de Sardigna e Còrsica. Est mortu su 9 de santugaine de su 1427, lassende totu sos tìtulos e sos possedimentos suos a su fìgiu Antoni.
