Prima chistione. Sa bandera grogu-biaita est torra bentulende in Cherson mancari sos russos nàrgiant chi, presentes o mancu, cussa zona est torra s’issoro a pustis de su referendum. Segunda. Sos russos, cun Medvedev, ant naradu chi galu sunt a l’impreare totu cantu su potentziale bèllicu issoro, e difatis in Kiev non si fidant.
Sas tifoserias a boghes postas sunt, aberende unu capìtulu nou de dialètica de bundu isperende (ebbeniminde paghe) chi sas acontèssidas diant resone a sas tesis issoro.
Intre sos atlantistas b’at chie est faeddende de unu grandu singiale de debilesa de sa Rùssia in s’òtica de sa possìbile derrota militare de Mosca che chi sa gherra atuale esseret unu disafiu a Risiko! (e in Risiko! sa Rùssia nemmancu b’est!); intre sos multipolaristas ghetende·si a diplomàticos b’at chie cheret bìdere in sa mossa de su zar una proposta efetiva de paghe pro sighire a nàrrere chi sa neghe est de Zelensky.
Si cherimus cumprèndere sas tendèntzias de custa gherra mala a sessare, forsis diat èssere mègius a non nos informare petzi dae s’informatzione italiana, bona ebbia a cristallizare sas tifoserias in pessu mentovadas ma no a tretu de nos presentare iscenàrios e personàgios de custu tristu passàgiu istòricu.
Pro nàrrere: intre Aleksandr Dugin e Evgenij Prigožin, su chi colat comente Rasputin noeddu est su primu. Su filòsofu eurasiatista (at a èssere sa barba?) colat che “s’ideòlogu”, “sa conca” de Putin. S’àteru comente “su chef”. De custa manera sas essidas de su primu in Telegram sunt ogetu de artìculos (chi no agatamus in s’imprenta internatzionale de primore); sas de su segundu, meda prus graes, nono o “en passant”.
Ite at naradu Dugin? Chi s’autòcrate, si devet pigare «responsabilidade intrea in casu de derrota». Messàgiu, su de Dugin, cundidu cun riferimentos a su libru “The golden bough” de James Frazes e a su re de s’abba mortu sacrificadu ca non resesseit a fàghere pròere. Como cussu messàgiu non b’est prus; Dugin nche l’at tòddidu e sa noa nche l’ant posta in intro de sos giallos. Pèrdida s’ocasione de nàrrere chi Dugin est su chi est (est a nàrrere pagu prus de nudda).
Ite at naradu imbetzes su mere de su grupu Wagner? Bah, cosighedda! S’est limitadu a denuntziare su guvernadore de Pedruburgu Aleksandr Beglov, unu intre sos prus fideles de Putin dae ora e membru de su Cussìgiu de seguresa de sa Federatzione russa. Mancari sa briga movat dae chistiones de rublos (apaltos in mancu a sa Wagner), s’acusa est de “traitoria” pedende s’interventu de sa Procura generale e de cussos cristianos masedos de s’Fsb. Cosighedda!
A custu, a Prigožin, b’at chie lu timet in Rùssia pro totu su logu chi s’est pighende, ma inoghe su Rasputin at a sighire a èssere Dugin. E nois ispramminende inditos tàticos e istratègicos pro cumprèndere su post-Cherson.
màuru piredda
Leave a comment