Cherèmule, Patada, Bunnànnaru e Bànari, in biblioteca unu disafiu de leturas

S’assòtziu culturale “Àndala Noa”, chi est s’organismu chi gestit sas bibliotecas comunales de Bànari, Bunnànnaru, Cherèmule e Patada, est organizende unu disafiu de leturas pro mannos intituladu “Sfida tra le pagine: concorso di lettura per adulti” . Su cuncursu est indiritzadu a sos tzitadinos redidentes in cussos Comunes e, comintzende sa prima die de martzu, at a durare finas a su 31 de maju. Tres meses, in pràtica. Custas sa finalidades de su progetu: promòvere sa letura dende fortza a s’abitùdine de sa letura intre sos mannos oferende·lis un’esperièntzia càrriga de istìmulos e de de interessu; valorizare sas bibliotecas favorende·nde sa frecuentatzione e faghende·nde connòschere su patrimòniu libràriu; creare una comunidade de letores istimulende su cunfrontu de opiniones movende dae sos libros lèghidos e afortiende su sentidu de apartenèntzia; arrichire su bagàlliu culturale oferende s’oportunidade de iscobèrrere gèneres noos, autores e temàticas pro mèdiu de una seletzione ispetzìfica; intzentivare sa continuidade de sa letura gràtzias a unu sistema a puntos e a sa possibilidade de bìnchere prèmios. «In sìntesi – narant sos organizadores –, custa initziativa punnat a trasformare sa letura in un’esperièntzia de iscoberta cumpartzida e de crèschida personale valorizende in su matessi tempus su ruolu de sas bibliotecas e de su tessutu culturale locale». Custu su disafiu: cada mese su cuncursu est dedicadu a unu tema ispetzìficu cun sos iscritos chi devent lèghere nessi unu libru parte de su tema propostu; una bia sessada sa letura e torradu su libru a biblioteca, sos letores retzint unu puntu in sa tèssera issoro. Sos chi otenent tres puntos podent partetzipare a s’estratzione finale in su mese de làmpadas. Custos sos argumentos de sos tres meses: Sardigna (martzu), clàssicos (abrile), literadura istràngia (maju).