Chentu e 18 annos a oe nascheit Remundu Piras

Chentu e 18 annos a oe nascheit Remundu Piras, si non su prus mannu unu intre sos prus improvisadores mannos de sarda poesia. Nàschidu su 1905 in Biddanoa, si contat chi nde suspeit s’arte poètica a minore, cando sa mama nche lu giugheit a sa funtana de su paradisu. Issu etotu, faeddende de custu, e ammentende sa mama, iscrieit unu sonetu chi connoschimus tituladu comente “Ispiju lìmpidu”: «Infatis mi naiat calchi ‘olta / “S’essis poete tue est proa mia / ca a sa funtana t’apo jutu apolta”». Oe de tiu Remundu podimus lèghere sas poesias suas imprentadas dae Della Torre e partzidas in bator volumes: sos sonetos (cheret chi “O sardu si ses sardu e si ses bonu” e “Mistèriu” cherent fatas connòschere a totu cantos); sas modas (nòdida sa pro Santu Nenaldu, «Nenaldu sun tres annos chi ti prego pro sos dispersos de custa dimora, sun oto o noe chi mancan ancora…»); sas otavas seberadas intre sas chi canteit a bolu cun sos rivales de tando (isse – cun esòrdiu in Montresta a 19 annos – at poetadu in garas cun Barore Sassu, Antoni Cubeddu, Barore Tucone, Juanninu Fadda, Antoni e Gavinu Piredda, Andria Ninniri, Pepe Sozu, Màriu Màsala, Frantziscu Mura e àteros); sas “Bonas noas” (sàtiras e tertzinas). Leghende sas poesias iscritas dae tiu Remundu o resende·nos sas chi canteit, a beru leamus podda a cumprèndere si isse fiat mègius comente iscritore o comente estemporàneu. Ma forsis est giustu chi fintzas nois tengiamus unu mistèriu. Ma giustu est a ammentare a tiu Remundu finamentas pro su refudu suo de s’adeguare a su fascismu chi, impuntzadu dae sa Crèsia, pongeit su bavàlliu a sas garas. Pro isse sa poesia fiat libertade. E pro seguru sos preìderos non teniant grandu simpatia pro unu carchi cosa l’iscrieit («S’òmine chi a fèmina si ‘eltis / dùbbios faghet bènnere a sa mente…» fiat pro sos babbais) e la canteis in contu issoro. Una vida in sos palcos, sa mègius boghe mancari sa boghe, tiu Remundu si nche morgeit su 21 de maju de 45 annos a como in bidda sua. Nemmancu unu mese in antis de sa dispedida fiat cantende cun Pepe Sozu, in cudda Montresta in ue comintzeit a cantare pro sos sardos.

Màuru Piredda