Uno de sos problemas de sas prataformas aprontadas pro sos utentes in cherta de rispostas dae s’Intelligèntzia artifitziale pertocat sa seguresa de sos datos. Unu problema esponentziale sende chi sunt semper de prus sos chi bi recurrent pro cale si siat àmbitu de aplicatzione: istèrrida de testos, solutzione de problemas e gasi sighende·bi·la.
A su presente sunt prus de 100.000 sas credentziales de profilos ChatGPT chi unos cantos malintragnados ant violadu e postu in bèndida in su web iscuru. E no est unu datu de pagu contu.
Sa noa est essida a campu gràtzias a una chirca de un’azienda de seguresa cun sede printzipale in Singapore, Group-IB, chi at identificadu 101.134 dispositivos infetados e cun sas credentziales ChatGPT sarvadas.
Sa majoria de sos profilos cumpromissos los ant violados cun sos aplicativos malèsigos Raccoon, Vidar e Redline, una tipologia de malware connota finamentas comente stealer e impreada pro furare informatziones e dato sensìbiles.
Comente si podent ablandare sos arriscos? Group-IB cussìgiat de agiornare sas password cun regularidade e de protzèdere cun s’autenticatzione a duos fatores.
Ma finamentas un’impreu cussente de su chatbot est de importu mannu pro evitare situatziones de perìgulu. Pro nàrrere, est mègius a evitare de inserire informatziones sensìbiles in su prompt (ammentemus·nos chi ChatGPT mantenet in memòria totu sas allegas) e provìdere a eliminare sas tzarradas cando non serbint prus.
S’impreu de custa architetura at rivolutzionadu su campu de su linguàgiu naturale permitende a su modellu de elaborare e cumprèndere una cantidade islacanada de datos testuales. Duncas est craru chi s’amparu de sa privadesa de sos datos rapresentat una chistione de grandu importu in intro de s’impreu de custa chatbot. Su de sas credentziales est argumentu prus chi non delicadu.
Gianfranca Orunesu
Leave a comment