B’at tempus fintzas a su 27 de martzu pro si nche marcare a Qworld Nickel20, unu cursu elementare chi tratat sa computatzione cuantìstica e sos algoritmos oracolares movende dae su materiale introdutivu Nickel aprontadu dae Qworld.
S’eventu – organizadu dae QItaly e CRS4 in s’àmbitu de su Cagliari Digital Lab – s’at a pòdere sighire in modalidade mista (in s’Ex Distilleria de Casteddu, in presèntzia, e in lìnia in forma sìncrona e asìncrona). Sos addòbios cumintzant su 28 de martzu a sas bator de sero, e sighint su 31 de martzu e dae su 1 a su 4 de abrile.
Su cursu frunit notziones in contu de algoritmos elementares de s’informàtica cuantìstica e oracolares. Ogni die ant a èssere assignados còmpitos chi sos partetzipantes depent acumprire: chie los cumpletat cun profetu at a retzire su diploma de QNickel. Sa limba de sas letziones est s’inglesu, ma sos mentor ant a sighire sos istudiantes. Est de importu a àere unu computadore connètidu a sa rete e a installare Python in ambiente Conda, sos pachetes Qiskit e Corc, o aprontare unu contu in Google Colab pro fàghere sas esertzitatziones. Diat èssere mègius a connòschere sas madrighes vetores, sos nùmeros cumplessos, su limbàgiu de programmatzione Python, àere frecuentadu su cursu Qbronze o unu cursu ecuivalente de introdutzione a sa programmatzione cuantìstica.
Ma it’est unu computadore quantum? Est una màchina cunformada a su cuntzetu de qubit comente unidade lògica fundamentale; unu sistema cuantìsticu a duos livellos chi, pro more de sas ispetzifidades suas, si podet agatare in subrapositzione in s’istadu de 0 e 1 in su mentres de sa computatzione. Sa correlatzione intre sos qubit si narat entaglement: podimus otènnere s’istadu 0 o 1 petzi si faghimus collassare sa subrapositzione de cussa mesura.
Est possìbile a creare un’istadu sìngulu chi apat caraterìsticas de grupos intreos de istados: gasi, unas cantas tipologias de problemas las risolvent prus a lestru a cunfrontu de sos computadores traditzionales; custa propiedade est tzertificada dae 30 annos de isvilupos in s’anàlisi funtzionale matemàtica.
Chie nde cheret ischire de prus in contu de s’eventu podet visitare sa pàgina dedicada a s’eventu.
Gianfranca Orunesu
Leave a comment