Como sunt medas a beru sos documentos chi si podent lèghere e istudiare in s’Archìviu de Istadu de Casteddu. Gràtzias a unu tzensimentu nou sunt aumentados dae 112 a 897 sos faldones e sos fascìculos chi si podent cunsultare.
Custu traballu at a permìtere de connòschere mègius, pro mèdiu de lìteras istitutzionales e privadas, disinnos, apuntos e prus de 8.000 fotografias, prus de chentu annos de istòria de s’archeologia in Sardigna, dae su 1838 a su 1982.
A pustis de unas cantas tràmudas e istesiamentos, sceti una parte minore de custu patrimòniu fiat disponìbile. Ma, gràtzias a unu finantziamentu ministeriale de 800.000 de èuros, destinadu a su progetu prus mannu de restàuru e abaloramentu de su patrimòniu de s’archìviu fotogràficu de sa Supraintendèntzia Archeologia, bellas artes e paisàgiu pro sa tzitade metropolitana de Casteddu e sas provìntzias de Aristanis e Sud Sardigna, su Segretariadu regionale de su Ministèriu de sa Cultura pro sa Sardigna, in collaboratzione cun sa Supraintendèntzia e s’Archìviu de Istadu de Casteddu, at cunfiadu a s’impresa nugoresa Taulara s.r.l. s’incàrrigu (pro unu tantu de 15.000 de èuros) de su tzensimentu de s’archìviu istòricu.
ln mesu de sas cosas interessantes chi si podent lèghere b’at s’epistolàriu ricu de s’archeòlogu Antonio Taramelli, sas notas de Filippo Vivanet a sas ghias de su Cummissariadu Règiu de sos Museos e Iscavos de Antighidade, sa documentatzione de sos iscavos de su giòvanu Giuanne Lilliu impinnadu in s’incàrrigu de Ispetore de sa Supraintendèntzia.
(sa redatzione)
Leave a comment