Oto o 10mìgia no est cussa sa chistione. Eris in Casteddu b’at àpidu chie at manifestadu pro àere una sanidade de calidade e pùblica in custa terra. “Curiamo la Sardegna” fiat sa paràula de òrdine de sa manifestatzione aprontada dae sos sindacados cunfederales. Ma non b’aiat petzi traballadores de su cumpartu: assòtzios de malàidos, iscolas, amministradores locales, voluntàrios de su de tres setores ant pedidu a boghe sola su chi a sos territòrios mancat. Su corteu est mòvidu dae pratzale de Trentu rugrende s’arburada de Trieste e sas carreras de Roma e de Tàtari finas a pratza de su Carmine. «Collimus sas rechestas de totus sos territòrios – at naradu su segretàriu generale de sa Cgil sarda, Samuele Piddiu – chi dae tempus pedint a boghes sa netzessidade de unu diritu a sa salude meru e sìncheru: e mai b’at àpidu rispostas adeguadas dae parte de sa Regione». «Sos sardos non bi la faghent prus – at agiuntu sa segretària generale de sa Uil sarda, Francesca Ticca -, sa sanidade in Sardigna non funtzionat». «Non b’at un’organizatzione adeguada de sos servìtzios e mancu una programmatzione sòtziu-sanitària in su territòriu» denùntziant Cgil, Cisl e Uil sutaliniende chi «su caos gestionale pertocat totu sas istruturas». A bisu de sos sindacados, sos repartos de sos ospidales e sos puntos de primu interventu sunt suferentes. «Su resurtadu – acrarint sas siglas – est chi a sos tzitadinos sardos li negant su deretu a sa salude, ca sas listas de isetu sunt infinidas, sos interventos (fintzas sos urgentes) sunt rimandados e non b’at atzessu fàtzile pro sos servìtzios pùblicos. Chie podet pagare si podet curare, mancari fintzas in foras de sa Sardigna, sos àteros no». Pedida duncas una mesa de cunfrontu cun sos sindacados matessi. «Bi cheret deretu – at naradu su segretàriu generale de sa Cisl sarda, Gavino Carta – e cun solutziones lestras».
màuru piredda
foto Camilla Soru
Leave a comment