Su ko contra a su Sassuolo at fatu peorare sos ànimos in domo ruju-blu. Cun su disisperu a chintu e una classifica chi si faghet semper prus preocupante, sa sotziedade e s’allenadore Fabio Pisacane non cherent intèndere prus iscusas: retiru de iscuadra allongadu. Posca de sas fèrias ebbia de sa die de Pasca, sos giogadores sunt giai dae lunis in su tzentru isportivu de Assèmini, ue ant a abarrare serrados finas a sàbadu pro agatare torra ànimu e conca, e mescamente unione pro sa gara detzisiva cun sa Cremonese.
Sa partida in s’Unipol Domus contra a sos lombardos at a tènnere su sabore de un’isparègiu. Su Casteddu podet torrare gràtzias a su Bologna chi, binchende 2-1 contra a sa Cremonese, at firmadu su brincu, mantenende sos grigiu-rujos a tres puntos de distàntzia. Una vitòria diat permìtere a sos sardos de agguantare sos aversàrios e de torrare a isperare de abarrare in Sèrie A. Mancari su resurtadu finale, su Casteddu bidu in su primu tempus contra su Sassuolo no est istadu malu pro nudda. Unu rigore de Sebastiano Esposito aiat illusu sos milli e chimbighentos sustenidores arribados in trasferta, ma sos ruju-blu no ant ischidu dare su corfu finale a un’aversàriu chi a s’incomintzu pariat sena ideas.
Est in sa segunda parte de sa gara chi est torrada a essire sa malasorte de custos ùrtimos tempos (2 puntos ebbia in sas ùrtimas 8 garas). Duas faddinas de sa defensa ant regaladu sa rimonta a su Sassuolo, mentres sa faddida de Obert a rete bòida in s’ùrtimu minutu at marcadu sa de bator derrotas fatu a paris. “In su segundu tempus amus permissu nois a su Sassuolo de giogare – at decraradu cun amargura Pisacane -. Como serbit malìtzia agonìstica: mancant oto finales e non podimus prus isballiare”.
Fintzas su marcadore de sa die, Sebastiano Esposito, arribadu a chimbe gol in s’istajone, mustrat fadiga de cumprèndere su peoròngiu de s’iscuadra intre a su primu e a su segundu tempus: “Pedimus perdonu a sos tifosos e a su mister. Non isco ite est sutzessu in sa segunda parte, ma nos depimus ischidare su sonnu. Pro essire dae custu tunnel bisòngiat de s’allenare a su màssimu e a abarrare unidos”.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment