In su Senadu de sa Repùblica in Roma, chida chi intrat, s’at a faeddare de limba sarda e Carta Europea de sas limbas. Sas cummissiones cumpetentes, Costitutzionale e Afares Esteros, ant a ascurtare in auditzione una delegatzione de rapresentantes de sa minoria sarda. Su senadore Luciano Uras (SEL) chi totus ìndicant comente su chi at chertu s’assessora Firino in ue est, est su chi est cuncordende sos addòbios e at seberadu de persone duos òmimes de cultura: Bachis Bandinu e Pàulu Pillonca.
S’est fatu agiudare finas dae su cussigeri regionale Paolo Zedda (Rossomori) chi est finas su presentadore de una motzione subra sa chistione de sa Carta Europea in Cussìgiu Regionale. Intre sos duos òmines polìticos, e sos duos partidos, paret chi b’apat unu paru de acòrdu pro s’aministratzione de sa polìtica linguìstica in custos annos. Sos traballos però no andant bene ca sa chistione paret meda prus difìtzile de sa chi sos polìticos si pensaiant.
Su guvernu acadèmicu, comente si naraiat, est ostile a sa limba sarda, su bilantzu s’annu coladu est istadu mutzadu in totu e ocannu su dinare est pagu: su 0,025 % de su totale de cantu at a disponimentu sa Regione in un’annu. In prus, finas in custas dies, sa Regione est in dificultade pro aparitzare sa Die de sa Sardigna chi est abbarrada finas a custas ora sena finantziamentu. Si isetat unu decretu urgente in custas oras pro la pòdere fàghere a urtimera.
Su servìtziu limba sarda regionale at pèrdidu s’autonomia sua e l’ant acorpadu a s’editoria. De Pranu Triennale non si nde faeddat mancu prus e s’atividade fracòngia de totu custos annos paret arressa. Si su sardu meresset de àere una limba natzionale, o de abbarrare una federatzione de dialetos-variedades, paret su tema chi interessat de prus a custu guvernu. Cun s’idea chi una limba sarda comuna non bi depet èssere e sa chi b’est bolet indebilitada. Prus atentu si dat intamen a su folclore, a sa cultura popolare e a totu cussu chi est dialetizadu.
In su mentres finas sa chistione de sa Carta Europea no est andende bene pro sos polìticos chi la sighint. Si su Parlamentu at a ratifìcare, ma su livellu de protetzione de su sardu at a èssere prus bassu (prus bassu finas de sa 482 paret) de chie at a èssere sa curpa? Finas sas initziativas fatas finas a como non sunt partas bonas tecnicamente. Sa Motzione de Zedda in cussìgiu aiat ismentigadu su catalanu e no aiat bene incuadradu sa chistione de sas “limbas non territoriales”. Sa proposta de Uras in Parlamentu mancaiat in totu de sa parte tècnica de assignatzione de sos livellos de protetzione e duncas est comente chi non bi esseret mai istada.
Abbarrat però sa punna polìtica pro pònnere in fatu a custu tema (chi non si resesset a cumprire) e tando Uras e Zedda ant pedidu s’agiudu ‘tècnicu’ de duos autorevoles rapresentantes de su Movimentu Linguìsticu pro chircare de nde essire dae custu bennatzu. S’auditzione est fissada pro su 20, comente cunfirmant in su situ de su Senadu etotu e finas ambientes de sas minorias linguìsticas in Roma. Un’addòbiu cunvocados dies a como fiat brincadu, mentres pro sos catalanos aiant giai faeddadu Carlo Sechi e Mario Bruno. Los at a ascurtare su relatore de sa lege Francesco Palermo, senadore de su Sud Tirolo e costitutzionalista de s’universidade de Verona. Unu chi de minorias nd’ischit.
Leave a comment