Carta Europea, Cotti (M5S) ghetat s'allerta. E tenet resone

de Giuseppe Coròngiu –

Sa ratìfica de sa Carta Europea pro su sardu podet èssere una befa manna. Tenet resone Roberto Cotti, senadore M5S de Casteddu, chi unas cantas dies a como at iscritu unu comunicadu de allerta a totu sas fortzas polìticas e a sos movimentos.

In sas chidas coladas sa commissione Afares esteros de su Senadu at comintzadu a faeddare de su documentu chi isetat dae su 1992 de èssere aprovadu dae su Parlamentu italianu. Ma unu de sos testos chi est colende, lassadu in doda dae sos guvernos Monti e Letta, at in intro una trampa manna. Su sardu no est tuteladu comente àteras minorias, ma antzis tenet unu livellu de amparu unu pagu prus bàsciu de sa 482.

No est una novidade de custas oras, ma est semper presente a dies de oe. Dae su 2011, cando su Servìtziu Limba Sarda de sa Regione l’aiat denuntziada e duncas aiat mòvidu sa polìtica de tando. Su Cussìgiu regionale aiat aproadu unu documentu indiritzadu a su Parlamentu. Si fiant mòvidos finas presidentes, assessores, deputados e senadores. Sa proposta fiat morta cun su guvernu Monti, ma Letta, pagas dies in antis de di nch’andare, l’aiat torrada a pònnere.

Como tocat a fàghere sa matessi atzione de cumbinchimentu de tando, ca si nono, blochende cun sa Carta su livellu de protetzione de su sardu in bàsciu, non b’at àere prus ispera de tènnere una lege prus avantzada de sa 482.

Sa debilesa de totu sa chistione est chi sa classe dirigente sarda, cando faeddat de limba sarda in Roma, no est credìbile. Ca non l’impreat sa limba sua e, in Casteddu, cun unu guvernu acadèmicu finas contra, non tenimus totus sas cosas a postu e sa cussèntzia neta. Finas ca s’orientamentu de sa giunta e de sa majoria est meda dialetal-folclorìsticu e non de polìtica linguìstica sèria.

Ma tocat a alertare s’opinione pùblica e a sighire a portare a càstiu sa chistione. Nois b’amus a èssere.

Pro chie si cheret documentare in retza:

http://www.vitobiolchini.it/2012/03/29/ci-scrive-giuseppe-corongiu-attenti-alle-trappole-la-ratifica-della-carte-europea-delle-lingue-minoritarie-potrebbe-trasformarsi-in-beffa-per-il-sardo-ecco-come/

http://www.formaparis.com/blog/lunione-sarda-intervento-su-carta-europea-della-lingue-di-giuseppe-corongiu

https://bolognesu.wordpress.com/2012/03/13/corongiu-monti-1-0/

http://consiglio.regione.sardegna.it/xivlegislatura/Mozioni/Moz196.asp

http://ricerca.gelocal.it/lanuovasardegna/archivio/lanuovasardegna/2004/05/22/SL1PO_SL104.html

http://www.sardegnaeliberta.it/giovedi-prossimo-in-aula-la-risoluzione-sulla-ratifica-ed-esecuzione-della-carta-europea-delle-lingue-regionali-o-minoritarie-da-parte-del-parlamento-italiano/

http://www.ilmessaggerosardo2.com/index.php?option=com_content&view=article&id=1429:torino-10-14-maggio-%E2%80%93-la-sardegna-al-salone-del-libro&Itemid=117