Su 20 de nadale de su 1973 moriat in un’atentadu terrorìsticu su presidente de su guvernu ispagnolu, s’ammiràlliu Luis Carrero Blanco. Sa cantidade de esplosivu usada fiat de gasi manna chi aiat lassadu unu fossu de unos binti metros de diàmetru e sa màchina in ue fiat sètzidu su polìticu nche fiat pigada a subra de sa terratza de su cullègiu de sos gesuitas, a costàgiu de sa crèsia in ue soliat andare a missa ogna mangianu.
Fiat capu de su guvernu dae su mese de làmpadas de su matessi annu, cando pro sa prima borta dae sa gherra de Ispagna su Caudillo Francisco Franco aiat rinuntziadu a cuddu s’incàrrigu.
S’Eta aiat rivendcadu luego s’atentadu, in ue fiant mortos finas sos àteros ocupantes de sa vetura, su politziotu Juan Atonio Bueno Fernández e s’autista José Luis Pérez.
Ma però ddo’at una versione alternativa de sos fatos. Segundu custa ipòtesi a segus de s’Eta ddoe fiant sos Istados Unidos. S’Ispagna difatis fiat sighende a mandare a in antis su progetu Islero, chi leaiat su nùmene dae su trau chi aiat mortu, in su 1947, a su torero famadu Manolete. Su progetu fiat sa produtzione de sa bomba atòmica, cosa chi pistighingiaiat sos americanos, ca cheriant controllare s’Ispagna dae unu puntu de bista geo-istratègicu.
Ma ddo’aiat finas un’àteru puntu de disacordu intre sos duos paisos. Sos ispagnolos cheriat intrare in sa Nato ma sos americanos cheriant chi in antis esserent passados dae unu regime ditatoriale a unu democràticu.
Custas diferèntzias fiant essidas a pìgiu in s’atopu ufitziale chi Carrero Blanco e su segretàriu de istadu americanu Henry Kissinger aiant tentu in Madrid duas dies in antis de sa morte de su polìticu ispagnolu.
S’amnistia de su 1977, chi at postu in libertade sos tres atentadores bascos, Jesús Zugarramurdi, José Miguel Beñarán e Javier Larreategi, at serradu su casu, cun s’Istadu chi at atzetadu duncas sa beridade ufitziale de unu fatu chi at indiritzadu in una diretzione diferente s’istòria de Ispagna.
(gianni muroni)
Leave a comment