Carchi nùmene de sos candidados in Sardigna

Carchi nùmene de sos candidados in Sardigna

Inghitzant a suprire sos nùmenes de sos candidados a sas eletziones de su 25 de cabudanni. In su PD b’est sa cunfirma de Silvio Lai comente ghia de sa lista e cun sa majoria de sas possibilidades de intrare in su Parlamentu, sigunda est Romina Mura chi est istada sa presidente de sa cummissione traballu de sa Camera de sos deputados. In dae in antis de sa lista de sos senadores b’est Marco Meloni chi traballat in sa segreteria natzionale de su partidu. Prus in bassu b’at carchi nùmene nou, comente su de Carla Bassu e Maria Del Zompo: ambas duas professoras de s’Universidade, sa prima insingiat in Tàtari Deretu Pùblicu, s’àtera imparat Farmacologia in Casteddu e est istada retore de s’Universidade casteddaja.

Su seberu de sos nùmenes est istadu unu pagu difìtzile, e lu est galu pro sas àteras fortzas polìticas italianas. Su Movimento Cinque stelle at ammanigiadu, pro oe, sas parlamentaries pro ischertare, cun unu votu in retza, chie pònnere in sas listas. In ie de sardos b’est Ettore Licheri e Alessandra Todde, de àteros galu si nd’ischit pagu. Sa dereta, chi paret potzat bìnchere cun àsiu, tenet carchi istorbu in prus a nàrrere chie b’at in sas listas suas, ca podet ingendrare una crisi in sa Giunta regionale.

(redatzione)

Leave a comment

Send a Comment

S'indiritzu email tuo no at a èssere publicadu.