Su dipartimentu de sas Iscièntzias umanìsticas e sotziales de s’Universidade de Tàtari at comintzadu una collaboratzione cun noe tzentros de educatzione ambientale e a sa sustenibilidade de sa Baronia e de su Nugoresu: su de Santa Luchia de Thiniscole, su de Lùvula, su de Osidde, su de Onanie, su de Alà, su de Nùgoro e su de Golothene. Punna de su grupu de chirca de su Dumas, ghiadu dae sa professora ordinària de Geografia Donatella Carboni, e de sos 9 Ceas, est sa de fàghere crèschere sa cussèntzia e sas capatzidades de adatamentu de sas comunidades locales a sos cambiamentos climàticos, in lìnia cun sas istrategias elaboradas dae sa Regione sarda. «Sas atziones – leghimus in su comunicadu de su Dumas – ant a comintzare cun un’indàgine in su territòriu, indiritzada a sas iscolas e a sa tzitadinàntzia. Dae sos resurtos de custa chirca at a mòvere unu percursu partetzipativu in contu de mudadas climàticas e de istrumentos operativos de protetzione tzivile pro abrandare s’arriscu». Pro mèdiu de custas atividades, e gasi etotu gràtzias a su sèberu de pràticas bonas de comunicatzione, «su progetu at a permìtere de individuare sos puntos de fortza e de debilesa, fintzas informativa, agiudende sas amministratziones in sa difusione de sos pianos de Protetzione tzivile comunales e afortiende sas istrategias pro favorèssere assentos a prus livellos intre istitutziones e tzitadinos». Su progetu est prus chi no atuale sende chi nos tocat a nos cunfrontare cun sos eventos meteoclimàticos estremos. In Sardigna, intre su 2021 su mese de santugaine de s’annu coladu, b’at àpidu sete puntas de temperaturas màssimas mai connotas in antis, 26 eventos de sicagna, chimbe eventos de pretzipitatziones estremas e unu nùmeru artu de fogos mannos che a su chi at interessadu su Montiferru su 2021.
mauro piredda
immàgine e info pigadas dae inoghe