A pustis de sa criminalidade e de su clima, fintzas ocannu est essida a campu sa chirca de su Sole24Ore pro sa clidade de sa vida (inoghe su giassu). Un’istùdiu chi aunit sos àteros duos e chi nd’annanghet tres a subra de sa sotziedade, s’economia e sa cultura. Sas provìntzias de Casteddu, Tàtari e Sud Sardigna ant pèrdidu positziones (sa peus est istada cussa turritana), sas àteras duas nd’ant balangiadas calicuna. Petzi Casteddu est in sa meidade arta de sa classìfica, sas àteras a pustis de sa sessantachimbe, cun su Sud Sardigna a curtzu a sa coa. Pro su prus bisòngiat de nàrrere chi sos balores generales sunt prus o mancu sos matessi de sos annos colados. Però mescamente sos particulares sunt ùtiles pro cumprèndere, cun s’istatìstica e non cun su sentidu, comente est posta s’ìsula nostra.
Sa chirca narat chi s’inflatzione chi pertocat su màndigu, at corfadu a forte sa Sardigna, mescamente Tàtari chi intre chentusès entes, est su penùrtimu. Fintzas sos àteros giassos sardos sunt prus o mancu serentes a sas positziones de fundu. Ùnica diferente est Casteddu chi at sufridu unu pagu de mancu s’inflatzione.
Àteru datu ispantosu est sa cantidade de mèigos de famìllia: mancari in s’imprenta paret chi non bi nde siant, dae sas istatìsticas paret chi sas provìtzias nostras sunt totu cantas in sas mègius vintisès. Cun Aristanis chi est in sa de ùndighi positziones. Ite cherent nàrrere custos nùmeros? Chi s’Itàlia est posta fintzas peus de nois, o chi sos dutores sunt ispartzinados male in su territòriu? Semper pro su chi pertocat sa salude, b’at una curiosidade: semus postos bene meda cun s’obesidade. Sas provìntzias sardas sunt cussas in ue si impreant de mancu meighinas pro su pesu demasiadu.
Sa provìntzia prus rica est Casteddu, ma issa puru in sa parte bàscia (58 a subra de 106). Tàtari, Aristanis e Nùgoro sighint belle in paris in chirrios de sas positziones de otanta. In fundu su Sud Sardigna. Su puntu chi dolet de prus in totue est sa de demografia, naschent pagas criaduras.
Sos brincos prus mannos bi sunt istados in Nùgoro e Aristanis, pro su chi pertocat su triballu; in su mentres Casteddu at megioradu meda in su setore de sa cultura. Sas rutas prus fungudas sunt in Tàtari: sos datos de sa criminalidade, sa sotziedade e s’ambiente sunt peorados medas in custos annos.
(redatzione)
Leave a comment