Est essidu a campu sa relata de su Sole 24 Ore a subra de sa calidade de sa vida in Itàlia (inoghe su ligàmene). Comente a semper sa classìfica generale est partzida in àteras prus minores e ispetzìficas chi pertocant ses argumentos: richesa, traballu, seguresa, sotziedade, ambiente e servìtzios, cultura. Cada una de custas giughet bìndighi inditadores. Sa classìfica est de importu mannu ca leat e ammanìgiat datos chi benint dae fontes ufitziales e dae sas istitutziones.
Sas bator provìntzias sardas, francu Casteddu, sunt faladas de positzione: Tàtari est falada de chimbe, Aristanis de tres, Nùgoro de oto, Sud Sardigna de ùndighi. A s’imbesse Casteddu est pigada, ma de duos iscalinos ebbia.
Su chi ispantat de Casteddu (inoghe su ligàmene) est su brincu de bintoto positzione in sa classìfica de sos afares e traballu. Casteddu est sa tzitade cun sas istruturas turìsticas mègius e cun su nùmeru prus mannu de gente chi si format a pustis de sas iscolas de s’Itàlia intrea. Est sa de bator in sa classìfica pro sas aziendas chi renessent a non tancare. Sa tzitade cabu-de-logu at megioradu fintzas in sa seguresa e de sa richesa. Ma si creschet in campos medas, falat fintzas mescamente in s’inditu de sa sotziedade, cun su problema de sos pitzinnos chi non naschent.
Tàtari e Aristanis si mantenent prus o mancu comente s’annu coladu (inoghe s’artìculu). Cun puntos de fortza: ambas duas sunt provìntzias seguras, fintzas prus de su barigadu. Sa tzitade de Eleonora est finamentas sa prus segura de s’Itàlia intrea. Megiorant fintzas sos datos econòmicos. Su chi est andende peus est s’ambiente e sos servìtzios pro Tàtari chi perdet barantaduas positziones e pro Aristanis s’inditu de sa sotziedade, chi est unu de sos peus de s’Istadu.
Nùgoro est cambiada meda sigunda sa relata de ocannu: unu brincu de trintaduas positziones a dae in antis pro su chi pertocat sa seguresa, e una ruta in dae segus de trintoto iscalinos pro sos servìtzios ligados a sa cultura e su tempus lìberu. Pro custa faina est s’isport a pesare de prus: in sos tretos de Nùgoro b’at paga gente chi faghet isport a fitianu e pagas istruturas.
Sa chi fiat prus in suta e chi est falada de prus est sa provìntzia de su Sud Sardigna, chi tenet bator inditos intre sos peus de s’Istadu: servìtzios e sotziedade, richesa, ambiente e cultura. Petzi duos l’agiudant a non rùere prus in suta. Su traballu, cun pagas aziendas chi tancant e cun albergos de bona calidade e sa seguresa, ca sos crìmines non sunt gasi meda. Resurtos però chi sunt a suta de sa media sarda e italiana.
Sa Sardigna chi essit fora dae su Covid est un’ìsula chi at su cabu-de-logu chi est creschende in cunfrontu de su restu chi andat a lenu e est mudende cara. Un’ìsula segura e cun unu clima bonu, ma pòbera de giòvanos e de servìtzios.
(redatzione)
Leave a comment