Su Casteddu de su Burgu torrat a si pesare in su chelu de su Goceanu cun una beste noa: sunt congruidos sos traballos de acontzu e posta in seguresa de sa fortilesa istòrica: difatis s’interbentu est su primu cantieri bintu e acabbadu in s’Ìsula intra de cussos finantziados dae su PNRR in su campu de sa seguresa sìsmica pro turres e crèsias.
Inauguradu su 5 de martzu de su 2025, su cantieri est istadu cumpletadu in prus pagu de doighi meses, rispetende sos cronoprogrammas de s’Unione Europea. Su progetu, rèzidu dae unu finantziamentu totale de 500 mizas èuros (cun 300 mizas destinados a sas òperas), at puntadu a sa cunservatzione pretzisa e a torrare a abbèrrere a su pùblicu. Su coro de s’interventu at riguardadu sa Turre Mastra, ue sunt istados fatos traballos de afortigadura, manutentzione de sas muraduras e restàuru de sos ambientes internos e de sa cobertura. A su matessi tempus, sos tècnicos ant traballadu in paritzas partes de sos muros pro lis dare seguresa e pro chi s’esseret muntesos bene in su tempus.
Fraigadu in su 1134 pro voluntade de su giuighe Gonare II de Lacon Gunale, su casteddu est istadu pro sèculos unu de sos giassos militares prus de importu pro tentare su logu de su Giuigadu de Torres. Mancari in su de XVI sèculos, cun sa dominatzione ispagnol,a apat pèrdidu s’importàntzia istratègica, est abarradu che unu de sos sìmbulos prus ladinos de Sardigna.
A pustis de sos primos traballos de acontzu de sos annos Sessanta, custu traballu nou punnat a unire sa tutela de su bene cun sa possubilidade de lu bisitare pro su turismu. Sa zestione de s’òpera est a incuru de s’architeta Eleonora Fiorentino (Soprintendèntzia ABAP de Casteddu), subra sa base de su progetu de s’architetu Bruno Billeci, mentras sa diretzione de sos traballos est istada afidada a s’architetu Antonio Sebastiano Gaias.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment