Cras est sa die natzionale (mègius, italiana) contra a su bullismu e a su cyberbullismu. Ma a minudu, ite sunt?
Su primu «est una manifestatzione violenta e fata de propòsitu, de tipu verbale o fìsicu e repìtida in su tempus». Custu «si presentat comente un’ischilìbriu de poderiu intre una persone o unu grupu chi nd’agredit un’àtera, chi non si podet difèndere in manera parinale, dannigende·la a livellu fìsicu o psicològicu».
Su segundu «Est una forma de bullismu prus fraitza e invasiva, fata pro mèdiu de dispositivos eletrònicos». Acumprende a atos che a custos, cun tempos lestros e unu pùblicu mannu interessadu dae sas cumpartziduras, «sa vìtima podet èssere esposta a fitianu e pro unu tempus indefinidu».
Custas sunt definitziones chi agatamus in sa pàgina Epicentro de s’Istitutu superiore de Sanidade, in ue duas sunt sas indàgines Hbsc (Health behaviour in school-aged children) publicadas in riferimentu a sa gioventude in iscola: sa de su 2018 e sa de su 2022.
In sa prima rilevatzione bidimus chi su datu italianu de su bullismu (13% de pitzocos interessados) fiat prus artu de s’internatzionale (10%); prus bassu su datu de su cyberbullismu: 9% in Itàlia e 14% in su mundu intreu. Intre sas regiones de s’istadu, sa Sardigna nche fiat unu puntu in suta de sa mèdia “natzionale” in ambos fenòmenos.
Sas pertzentuales sunt peoradas in sa rilevatzione de su 2022: bullismu a su 14,9% (+1,9% cunforma a su 13 de bator annos in antis) e cyberbullismu a su 15% (+6%). Sardigna semper cun fenòmenos prus limitados, ma non de meda: 14.4% (su bullismu suo fiat a su 12) e 13,7% (dae s’8 chi fiat in sa versione cyber sua).
Amus a dèvere bìdere sos datos agiornados pro cumprèndere sa tendèntzia atuale, ma est craru chi bi cheret una mègius allega pro limitare su fenòmenu. Pròpiu comintzende dae sa programmatzione de atziones in iscola e manu manu interessende sas famìlias e sas comunidades.
Gianfranca Orunesu
(Foto de Mikhail Nilov)
Leave a comment