In sa tzitade de Kazan, in Rùssia, si sunt addobiados sos rapresentantes de sos paisos chi ant aderidu a s’acordu econòmicu mutidu BRICS, dae sas initziales in inglesu de sos primos firmatàrios: Brasile, Rùssia, Ìndia, Tzina e Sudàfrica.
Est sa de sèighi editziones de su summit, cumintzadu su 22 de santugaine e chi at a finire su 24 de su mese. A prus de sos istados fundadores partètzipant Egitu, Etiòpia, Iran e Emirados Arabos Unidos.
Sa die in antis de s’addòbiu internatzionale Tzina e Ìndia ant fatu un’acordu chi previdet sa fine de sa cuntierra a s’ala de su Ladakh e de s’Arunachal Pradesh. Galu sos duos paisos no ant comunicadu sos detàllios de su tratadu e duncas no est craru si ant a retirare sas tropas issoro. Sos tretos interessados sunt de unos 3.500 chilòmetros.
Su Ladakh, parte de su Kashmir, in sa punta setentrionale de s’ìndia, e s’Arunachal Pradesh, parte de su Tibet istòricu, sunt rivendicados dae su guvernu de Pechinu. Deghinas de mìgias de sordados de ambos duos istados sunt ischierados in sas làcanas finas a como.
In su 2020 ddo’at àpidu atumbos intre sas duas partes chi at cajonadu mortos e fertos a unu chirru e a s’àteru. Sa càusa de su cunflitu armadu fiat chi sos indianos aiant mandadu sordados in risposta a s’imbiu de militares tzinesos, cunsideradu una provocatzione.
Ddo’at aterunu tretu, in sa regione de su Kashmir, chi sas duas potèntzias si sunt disputende e est s’Aksai Chin. In custu casu sa situatzione est a s’imbesse: est s’ìndia chi tenet rivendicatziones territoriales subra sa regione chi apartenet a sa Tzina.
S’acordu rapresentat unu resurtadu mannu pro sos BRICS, chi si proponent comente alternativa credìbile a su blocu otzidentale finas dae unu puntu de bista polìticu, fatu importante bidu sas diferèntzias e finas sas ostilidades chi esistiant intre custos paisos.
(gianni muroni)
Leave a comment