Est essida a campu sa relata “Competitivi perché sostenibili” de Unioncamere e de sa Fondatzione Symbola chi nos contat de una crèschida de sos brevetos birdes in Itàlia. Difatis, su Paisu s’annu coladu est lòmpidu tertzu in Europa pro sa presentada de ideas noas in custu setore, a dae segus de sa Germània e de sa Frantza.
Sa majoria de custas iscobertas l’ant fata a intro de aziendas cun su 82% de dimandas de registratzione, sas persones a sa sola su 13% ebbia. Custu cheret nàrrere chi sas impresas sunt proende a gastare soddos pro crèschere in sabidoria e annoare sa produtzione. Su datu est importante ca, semper pro sa relata, chie annoat tenet prus possibilidade de balangiare e de tènnere ligàmenes cun aziendas de fora, collende fintzas prus investimentos. Custa genia de aziendas at bisòngiu de traballadores cualificados, cun istùdios e tìtulos. Est de custa chida su datu chi sa fua de sos laureados est sighende, dae su Sud de s’Itàlia a su nord o, finamentas, a fora, a èsteru. Custos investimentos podent èssere una manera pro los mantènnere inoghe.
Sas fàbricas de maniestu de su nord Itàlia sunt cussas chi ghiant custu fenòmenu, cun belle su 60% de brevetos presentados. A pustis sa chirca iscientìfica (19%) e sas telecomunicatziones (7%). Sas ideas noas pertocant pro su 12% sa digitalizatzione de sa produida e s’ammanìgiu de s’energia; sas tecnologias pro sa medida elètrica e magnètica (7%); cussas pro tratare sas abbas brutas e su ludu (7%) e a concruos progetos ligados a sos mesos de trasportu elètricos e a àetras fainas.
Sa relata est unu sinnale chi carchi cosa s’est moende in un’Istadu betzu de pensu e cun pagos giòvanos. Tropu pagu però a cunfrontu de àteros logos de Europa chi sunt dae annos chi annoant e atirant traballadores cualificados, chi a fora, b’at de lu nàrrere, leant un’istipèndiu prus artu meda de inoghe.
Gabriele Tanda
Leave a comment