Sas opositziones aunidas aiant presentadu sa proposta pro dare su matessi tempus de congedu a sos babbos e a sas mamas, ismanniende sa cantidade de istipèndiu torradu dae s’INPS, dae s’otanta a su 100%. Sa Ragioneria de Istadu at botzadu sas cobertura finantziària, su guvernu, però, no at dadu ocasione peruna de annoare sa proposta, in contu de fundos, e l’at refudada de su totu. Est craru chi est divènnida sa cuntierra noa: sa dereta nende chi non podiat fàghere àteru, chi dinari non bi nd’at e chi sos àteros la depiant iscrìere mègius. Sa manca at atacadu nende chi a su guvernu non li nde interessat nudda nen de sas famìllias, nen de sas fèminas.
Ponende a banda sas mòvidas polìticas, su problema tocadu dae custa proposta est importante de a beru. Pro neghe de unu bàrriu diferente meda intre sas duas figuras, sas fèminas a s’ispissu timent a si fàghere unu fìgiu, ca sende mamas ant a èssere ausentes pro tempus maicantu dae su traballu e, prus a dae in antis, a sa sola cando b’at maladia o àteros problemas de sos minoreddos. A s’ispissu, a pustis de sa nàschida, sas fèminas ant tantos de cussos problemas de gestione chi lassant su traballu, mescamente ca depent cùrrere contra a sos òmines chi non nd’ant. Custu sèberu, o mama o carriera, est un’istorbu mannu a sa crèschida demogràfica e, mescamente, a un’egualidade reale intre sos sessos. E in una sotziedade chi non bidet prus a sas criaduras che a un’òbrigu, comente a dae in antis, si lassat pèrdere cussu disìgiu pro una vida prus trancuilla. Ma no est giustu mancu pro sos babbos chi non podent sighire sa crèschida de sos fìgios e si los gosare die cun die, bivende·si annos de maghia chi non torrant prus.
Su problema de sas pagas nàschidas est cumplessu, b’intrant su prètziu de sa vida, sos istipèndios bàscios e àteras milli fainas chi si podent aprontare e chi sunt firmas dae annos. Unu problema chi no est petzi istratègicu pro s’Istadu, ma est una chistione de deretos de milliones de persones chi sufrint pro neghe de custas tortesas.
Gabriele Tanda
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment