Su 9 de trìulas cumintzat su BosaAntica-International Summer Festival, organizadu dae su sòtziu InterArtes.
Su tema de s’editzione de ocannu, chi tenet a diretore artìsticu a Jana Bitti, est s’esecutzione de s’Integrale de sas Sonate pro violinu e pianoforte de Beethoven.
Su cuntzertu de abertura, cun su pianista Francesco Maria Moncher, at a èssere dedicadu a su maistru Aldo Ciccolini.
Intre sos artistas chi s’ant a esibire in sas dies intre su 9 e su 18 ddo’ant a èssere Silvia Careddu, giai primu flàutu de sos Wiener Philarmoniker e primu flàutu de sa Orchestre National de France e Ivan Rabaglia, violinista, e Alberto Miodini, pianista, chi faghent parte de su Trio di Parma.
S’elencu de sos musitzista previdet finas a Giulio Biddau e Francesco Maria Moncher, pianistas, Magda Kozcka, sopranu ungheresu, Agneszka Marucha, violinista polaca e maistra in s’Acadèmia Chopin de Varsàvia, Michelangelo Lentini, violinista e maistru in su cunservatòriu de Tàtari, Riccardo Ghiani, primu flàutu de s’orchestra de sa Fondazione Teatro Lirico de Casteddu, Dimitri Mattu, violinista, Angela Oliviero e Francesca Carta, pianistas e maistras in su cunservatòriu de Casteddu, Paloma Tironi, arpista e maistra in su cunservatòriu de Tàtari, su pianista acumpangiadore Manuele Pinna.
Ddo’ant a èssere puru sos laboratòrios de sas Ensemble de flàutos e arpas cun sas maistras Alessandra Manca, arpista, e Jana Bitti, flautista.
In prus ddo’at a àere una fusione intre pintura e mùsica pro more de s’artista bosincu Mariano Chelo, in s’atelier suo MAP.
Su festival tenet finas sa collaboratzione de su tzìrculu Legambiente L’Olivastro de Tàtari, chi mandat a in antis s’initziativa Le Armonie della Bellezza de sa famìllia Abbado.
Che a semper, a sa fine de su Festival ant a intregare su prèmiu BosaAntica a una personalidade de s’ambiente culturale e musicale.
Su regista Michele Gagliani at a garantire sas ripresas vìdeu, disponìbiles in direta in sos canales Youtube Bosa Antica, Twitter @bosaantica, Instagram @bosaantica.
(giannimuroni)
Leave a comment