de Martine Faedda
In internet, dd’ischimus, est prenu de giassos e pàginas facebook chi tratant temàticas a pitzu de s’istòria antiga sarda. Dae pagu tempus, però, est essida a campu una proposta noa, cramada NURNET — La rete dei Nuraghi.
Bene! Ma, nadu chi de giassos chi s’interessant de custas cosas bi nd’ant meda, it’est chi b’at de nou? Si bisitades su situ www.nurnet.it, a manu manca de sa pàgina podides agatare una cartina de s’ìsula nostra. Clicadu chi ais in cue bos aberit una cosa de ispantu: su Geoportale de NURNET, su catastu de is benes archeològicos sardos. Calicunu si podet preguntare: ma, “entes” b’ant in dae segus?
No, est sa risposta, est isceti una bidea nàschida dae unu grupu de amantiosos de sa Tziviltade Nuragica, chi gratzias a is tecnologias noas at potidu fraigare custu. Carchi duda podet sighire a bennere a conca, sende chi totus ischimus chi, isceti de Nuraghes bi nd’at nessi oto mìgia. Sa cosa noa est chi NURNET at pedidu agiudu a totus is sardos chi, in manera simple e direta, podent agiornare su Geoportale ponende fotos, videos e informatziones collidas in is bisitas a is benes (Tumbas de Gigantes, Domus de Janas, e gasi sighende).
NURNET non faghet isceti custu. Sa punna est cussa de ischidare is sardos pro li fàghere cumprèndere chi tenimus in manu unu ischisorgiu chi podet finas agiuare s’economia sarda. Difatis a contivigiare s’istòria nostra e is benes nostros, tropu bias lassados a si che morrere, cumbenit e unu turismu culturale, fatu comente si tocat, podet agiuare s’economia nostra chi totus ischimus comente est posta.
Ma Nurnet nos est finas pràghidu ca amus bidu chi sa limba sarda est agradèssida. Su Geoportale si podet impreare in tres limbas: italianu, inglesu e sardu. In sa pàgina facebook cosa sua, da poi, non mancant post in sardu e medas amigos (de is 20000 iscritos) impreant sa limba a manera normale. Beru est chi, finas a cando nos amus a ispantare de custas cosas bolet nàrrere chi su caminu est galu longu. Ma a bìdere chi b’est calicunu chi non tenet problema a lu tratare, mancari atesu meda dae àteros logos prus ischierados, nos faghet isperare pro su benidore.
Gràtzias Nurnet.
Leave a comment