Su 2 de freàrgiu de su 1969 moriat Boris Karloff. Atore inglesu, nàschidu comente William Henry Pratt, est unu de sos protagonistas sìmbolu de sa tzinematografia horror, pro su prus de sos annos ‘30 e ‘40.
Sa cara de s’intèrprete britànnicu est ligada massimamente a su mostre de Frankenstein, sa pellìcula de su 1931 chi at definidu sa figura de su personàgiu a livellu populare, istesiende·nche dae su romanzu de Mary Shelley.
Pratt aiat lassadu s’Inghilterra galu giòvanu e fiat emigradu a Cànada, in ue aiat traballadu comente atore de teatru.
A coa si fiat trasferidu a California, in ue fiat intradu in s’indùstria de s’ispetàculu de Hollywood.
A pustis de paritzas pellìculas, giai in su tempus de su tzìnema mudu, fiat lòmpidu s’èsitu subranaradu de Frankenstein.
S’annu in fatu fiat bènnida La Mummia, chi aiat tentu su matessi una renèssida manna.
Su nùmene e sa fama de Karloff sunt ligados a sas pellìculas de s’orrore de sa domo de produtzione Universal, chi cun una sèrie de filmis aiat creadu unu mundu populadu dae figuras che a su Conte Dràcula, s’Òmine Lupu, s’Òmine Invisìbile, a prus de cuddos interpretados dae Karloff etotu.
A diferèntzia però de aterunu de sos atores emblemàticos de cudda edade de oro de su terrore, Bela Lugosi, chi non nche fiat mai resurtadu a abbandonare de su totu su ruolu de Dràcula, Boris Karloof aiat mustradu de èssere capatze de retzitare in pellìculas de àtera genia puru. Intre custas La pattuglia sperduta, filmi de gherra de John Ford.
In sos annos ‘60 s’atore aiat traballadu finas in Italia in I tre volti della paura de Mario Bava.
In sa vida privada Karloff fiat su contràriu de sos mostres chi dd’aiant fatu bogare fama, difatis soliat partetzipare a eventos de benefitzèntzia pro pipios.
Fiat nàschidu in su 1887 e a sa fine de sos annos ‘50 fiat torradu a bìvere in Inghilterra, in ue fiat mortu.
(gianni muroni)
Leave a comment