In su note coladu sa SOGIN (chi si presentat in su giassu suo comente “società di Stato incaricata del decommissioning degli impianti nucleari e della gestione dei rifiuti radioattivi”) in ue “decommissioning” cheret nàrrere istudadura at publicadu s’elencu de sos logos probàbiles in ue s’at a pòdere fraigare su depòsitu de s’arga nucleare e radiativa.
Bi sunt chèrfidos ses annos de traballu ca in totu s’Itàlia si sunt artziadas chèscias e nemos si cheriat leare sa responsabilidade de su sèberu e custa arressa at significadu santziones dae s’Europa pro s’Itàlia. In prus sos critèrios postos (inoghe) non sunt istados postos petzi dae s’Itàlia ma dae sa IAEA (International Atomic Energy Agency). Sos prus de importu sunt istados chi sos logos depiant àere: paga gente; paga atividade de terremotos, vulcanos e disàrios; un’artivesa de non prus de 700 metros a subra de su mare; una distàntzia manna dae sa costa, ma finas dae sas ferrovias e sas istradas prus manna, ma finas unu collegamentu bonu cun custas ùrtimas duas; s’assèntzia de produtziones agro-alimentares de importu mannu. Ma fintzas s’insularidade at àpidu unu rolu de importu in malu pro su sèberu.
Sunt istados inditados 67 giassos (carca inoghe pro los bidere): 8 in Piemonte, 24 in sa zona intre Làtziu e Toscana, 17 in un’àtera zona intre Pullia e Basilicata, bator in Sitzìlia e 14 in Sardigna. Sos logos ant àpidu una classificatzione de bator colores dae sos mègius a sos peus. Sos chi sunt istados inditados comente sos prus dèghidos a acollire su depòsitu ùnicu de s’arga radiativa non sunt in Sardigna, ma a probe de Alessàndria e in sa provìntzia de Viterbo. Sos giassos sardos sunt totus in sos colores de sa bàlia prus bàscia.
Est agabbada inoghe? No, ca pro sessanta dies dae oe sas Regiones e sos Ente de su logu (sas comunas mescamente) ant a pònnere chistiones e problemas a sa SOGIN. Pro andare a dae in antis, difatis, bi cheret su cunsensu de sas comunidades. S’istorbu prus mannu at a èssere chi totus sos giassos ant a pònnere chistiones e problemas.
Posca de cussas sessanta dies s’at a seberare su logu e in bator annos s’at a fraigare unu depòsitu mannu chentu chimbanta ètaros (110 de depòsitu e 40 pro su parcu tecnològicu) chi at a acollire 78 mìgia metros cubos de arga cun una radiatividade de fortza mèdia o paga e a pustis àteros 17 mìgia cun una fortza arta. Su depòsitu at a durare pro 300 annos.
Sa Sardigna paret chi non siat in arriscu, ma giai custu mangianu ant faeddados contra a su depòsitu in s’ìsula nostra, carchi polìticu sardu e sa Corona de Logu. Un’ìsula chi at giai votadu pro nàrrere nono a su nucleare in su 2011 e chi acollit, a dolu mannu, sa majoria de sas bases militares de s’Istadu italianu, est narende craru chi non cheret àtera arga dae fora.
(redatzione)
Leave a comment