Su professore de Biddamassàrgia at iscritu in su blog suo un’artìculu pro compudare su chi b’at capitende in custas dies in sa polìtica italiana e si b’at aficu pro sa Sardigna.
Dae Amsterdam issu osservat cun unu misturu de amargura e befa sos giogos de sos polìticos italianos e sardos e (si) domandat cale sunt sos progetos de su partidu prus votadu ( M5S) in s’ìsula pro sa Sardigna, mescamente si in sas votatziones regionales imbenientes at a torrare a bìnchere. Non diat èssere malu si diamus àere fintzas sas rispostas dae inoghe a pagu tempus.
- Ite punna ais pro fàghere de su sardu una limba “normale”?
- Ite cherides fàghere pro fàghere intrare su sardu in s’àmbitu pùblicu e a nde lu bogare dae sa diglossia?
- A lu cherides a su sardu in sos mèdios massivos?
- A lu cherides a su sardu in s’iscola? In ite manera?
- A cherides a finantziare sa produtzione de materiale didàticu in sardu?
- A cherides a istudiare sos ligàmenes intre de situatzione linguìstica, ispartzinamentu iscolàsticu e sa disocupatzione de sos giòvanos?
- E a manera prus generale: cale est sa positzione bostra pro su chi pertocat s’indipendèntzia linguìstica e culturale de sa Sardigna?
In agabbu de artìculu Roberto Bolognesi pregontat si sa punna prus manna de sos grillinos est de nde torrare sa Sardigna a s’Itàlia, ammentende su chi aiat naradu una deputada sarda de su M5S elìgida tando tando: ma est de a beru su chi cherimus nois sardos?